Ceyhun Bayramov Banqladeşin xarici işlər üzrə dövlət naziri ilə görüşüb

Azərbaycanın xarici işlər naziri Ceyhun Bayramov Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) VII Sammiti çərçivəsində Banqladeşin xarici işlər üzrə dövlət naziri Humayun Kabirlə görüşüb.Bu barədə Azərbaycan Xarici İşlər Nazirliyi məlumat yayıb.

Görüşdə AQEM-in VII Sammitinin uğurlu nəticələri məmnunluqla qeyd edilib, Azərbaycan və Banqladeş arasında ikitərəfli münasibətlərin inkişaf perspektivləri, həmçinin beynəlxalq və regional təşkilatlar çərçivəsində əməkdaşlıq məsələləri müzakirə olunub.

Tərəflər siyasi dialoqun və qarşılıqlı səfərlərin əhəmiyyətini vurğulayıb, ikitərəfli əlaqələrin müxtəlif sahələrdə genişləndirilməsi imkanlarını nəzərdən keçiriblər. Diplomatik və xidməti pasport sahiblərinin viza tələbindən azad edilməsi barədə razılaşmanın əhəmiyyəti qeyd olunub.

Enerji, təhsil və humanitar sahələrdə əməkdaşlığın inkişafı, mövcud imkanlardan səmərəli istifadə və xalqlar arasında əlaqələrin gücləndirilməsi məsələləri də müzakirə edilib.

Görüşdə BMT çərçivəsində əməkdaşlıq və qarşılıqlı dəstəyin əhəmiyyəti vurğulanıb. Tərəflər BMT Baş Assambleyasının Prezidenti ilə keçirilmiş görüşü məmnunluqla xatırladıb, çoxtərəfli platformalarda birgə səylərin davam etdirilməsinin vacibliyini qeyd ediblər.

Həmçinin gələn il Azərbaycanın ev sahibliyi edəcəyi İslam Əməkdaşlıq Təşkilatının Sammiti və bu çərçivədə əməkdaşlıq imkanları ətrafında fikir mübadiləsi aparılıb.

Ceyhun Bayramov Qoşulmama Hərəkatı çərçivəsində, o cümlədən Parlament Şəbəkəsi və Gənclər Təşkilatı vasitəsilə əməkdaşlığın əhəmiyyətini vurğulayıb. Bu mexanizmlər çərçivəsində parlamentlərarası və gənclər arasında əlaqələrin inkişaf etdirilməsinin vacibliyini qeyd edib.

Görüşdə, həmçinin qarşılıqlı maraq doğuran digər regional və beynəlxalq məsələlər müzakirə olunub.