Hərbi hissəni özbaşına tərk edən hərbçilər 200-300 manat cərimələnə bilər

Milli Məclisin Hüquq siyasəti və dövlət quruculuğu komitəsində bu gün müzakirəyə çıxarılan qanun layihəsinə əsasən, zabit, gizir, miçman və müddətdən artıq həqiqi hərbi xidmət hərbi qulluqçusu hərbi hissəni və ya xidmət yerini özbaşına tərk etdikdə, yaxud üzrlü səbəb olmadan bir gündən artıq, 10 gündən çox olmayaraq xidmətə gəlmədikdə 200-300 manat cərimə edilə bilər.

Alternativ olaraq, ona 15 günədək inzibati həbs tətbiq oluna bilər.

İnzibati Xətalar Məcəlləsinə təklif edilən dəyişikliyə görə, həmin əməllər inzibati tənbeh qərarı qüvvəyə mindikdən sonra bir il ərzində təkrar törədilərsə, cərimə 300-500 manat olacaq və ya 10 gündən bir ayadək inzibati həbs tətbiq edilə biləcək.

Gülnar Nazimqızı