AFchamber: İnfrastruktur Orta Dəhlizin inkişafı üçün kifayət deyil

Orta Dəhliz üzrə iqtisadi əlaqələrin inkişafı yalnız nəqliyyat infrastrukturunun genişləndirilməsindən deyil, həm də biznes mühitinin şəffaflığından, proqnozlaşdırıla bilməsindən və rəqabət qabiliyyətindən asılıdır.

Bunu Azərbaycan-Fransa Ticarət Palatasının (AFchamber) icraçı direktoru Ceyhun Atayev Bakıda keçirilən Avropa İttifaqı – Azərbaycan Biznes Forumunda bildirib.

“Bu il diqqətimiz bağlantılara, infrastruktura və Orta Dəhlizə yönəlib. Fiziki infrastruktur, əlbəttə, vacibdir. Lakin təkcə avtomobil və dəmir yolları, limanlar uğurlu iqtisadi əlaqələr yarada bilməz. Bunun üçün sağlam biznes mühiti lazımdır. Bu mühit şəffaf, proqnozlaşdırıla bilən, rəqabətədavamlı və investisiyaları cəlb etmək iqtidarında olmalıdır”, – o qeyd edib.

Atayevin sözlərinə görə, sağlam biznes mühitinin qorunması üçün etibarlı məlumatlara, mövcud vəziyyətin obyektiv qiymətləndirilməsinə və əldə olunan nəticələr əsasında hərəkət etmək əzminə ehtiyac var.

O bildirib ki, effektiv diaqnostika yalnız mövcud problemlərin aşkarlanması deyil, həm də reallıqların dərk edilməsi, potensial risklərin idarə olunması və əsaslandırılmış qərarların qəbul edilməsi deməkdir.

Aytac