Qlobal dəyişikliklər Azərbaycanın gələcəyinin qorunmasını gündəmə gətirir - spikerin müavini

Dünyada baş verən texnoloji, ideoloji və geosiyasi dəyişikliklər Azərbaycanın gələcəyinin təmin olunması və qorunması barədə düşünməyi zəruri edir. Bunu Milli Məclis sədrinin birinci müavini bildirib.

“Çox ciddi dəyişikliklər baş verir və bu dəyişikliklər bütövlükdə bəşəriyyətin əhəmiyyətli keçid məqamlarını əks etdirir”, - o deyib.

Onun sözlərinə görə, texnoloji keçid həyatın bütün sahələrində özünü göstərir. Azərbaycanda da rəqəmsal inkişaf, robotlaşma və süni intellekt geniş tətbiq olunmağa başlayıb. Bu proseslər ölkənin iqtisadiyyatına və insanların gələcək həyatına birbaşa təsir göstərəcək.

Birinci vitse-spiker ideoloji dəyişikliklərin də dünyanın siyasi mənzərəsini yenidən formalaşdırdığını bildirib. Onun fikrincə, 19-cu və 20-ci əsrlərdə yaranmış ideoloji nəzəriyyələr yeni cərəyanlarla zənginləşir.

O, geosiyasi keçidə toxunaraq iqtisadi, siyasi və hərbi güc mərkəzlərinin dəyişdiyini, “Qlobal Cənub” anlayışının xüsusi əhəmiyyət qazandığını deyib. Nüfuz və resurslar uğrunda mübarizənin, bəzi hallarda isə müharibələrin müasir dünyanın əsas xüsusiyyətlərindən olduğunu vurğulayıb.

Birinci vitse-spiker Prezident İlham Əliyevin çıxışının qlobal dəyişikliklər fonunda Azərbaycanın gələcəyinin təmin edilməsi və qorunması ilə bağlı dövlət başçısının düşüncələrinin cəmiyyətə təqdimatı kimi qəbul edilməli olduğunu bildirib.

Gülnar Nazimqızı