Hicran Hüseynova uşaqlar və gənclərlə maarifləndirmə işinin gücləndirilməsinə çağırıb

Deputat Hicran Hüseynova bələdiyyələri, məktəbləri, medianı və digər sosial institutları uşaqlar və gənclərlə maarifləndirmə işini gücləndirməyə çağırıb.

O, xarici mərkəzlərin media və sosial şəbəkələr vasitəsilə gənclərə və ailələrə təsir göstərməyə çalışdığını bildirib.

“Şüarlarla deyil, daha sadə və əsaslı şəkildə söhbətlər aparmalı, görüşlər keçirməliyik”, - Hüseynova deyib.

Onun sözlərinə görə, gənclərin həyata baxışında və ailədaxili münasibətlərdə baş verən dəyişikliklər narahatlıq doğurur. Hüseynova bildirib ki, yerli özünüidarəetmə orqanları ailələri və onların gündəlik həyatını daha yaxından tanıdıqları üçün maarifləndirmə işində fəal iştirak etməlidirlər.

O, milli adətlərin, ailə dəyərlərinin və nümunəvi gənclərin təbliğini, uşaqların asudə vaxtının səmərəli təşkili üçün tədbirlərin keçirilməsini, gənclərin şəhid ailələri və qazilərlə görüşlərini təklif edib.

“Bir ölkənin varı, dövləti, gücü təkcə yeraltı və yerüstü sərvəti, iqtisadiyyatı, ordusu ilə ölçülmür. Ölkənin sərvəti həm də onun vətəndaşıdır, gəncidir, ailəsidir”, - Hüseynova bildirib.

Gülnar Nazimqızı