“Azərbaycanı siyahıdan silmək lazım deyil”

CNN telekanalının saytında ABŞ-ın Azərbaycandakı keçmiş səfiri, hazırda isə Estoniyada Beynəlxalq Müdafiə və Təhlükəsizlik Mərkəzinin direktoru, Atlantika Şurası yanında Dinu Patrisiu adına Avrasiya Mərkəzinin böyük elmi əməkdaşı Metyu Brayzanin məqaləsi dərc olunub.

ANN.Az-ın AzərTAc-a istinadən verdiyi məlumata görə, Brayza, “Azərbaycanı siyahıdan silmək lazım deyil” sərlövhəli məqaləsində yazır ki, prezident seçkilərində Prezident İlham Əliyevin namizədliyinə lazımi səviyyədə müxalif olmasa da, ATƏT Azərbaycanda seçki prosesini tənqid edib. 

Hazırda Prezident İ.Əliyevin populyarlığının azalmadığını deyən M.Brayza bildirib ki, iki il əvvəl ABŞ-ın Azərbaycanda səfiri işləyəndə İlham Əliyevin reytinqi 83-86 faiz arasında olub. Qərbin siyasi liderlərinin xəyallarına belə gətirə bilmədikləri bu populyarlıq prezidentin artıq onlar üçün sabitliyi təmin etdiyini düşünən və bunu arzulayan Azərbaycan vətəndaşlarının dəstəyinə söykənir. 

Keçmiş diplomat bildirir ki, Azərbaycan ona məxsus olan Dağlıq Qarabağ regionunun Ermənistan qoşunları tərəfindən işğal olunması nəticəsində xoas vəziyyətində idi: "Heydər Əliyevin hakimiyyətə qayıdışından sonra onun təşəbbüsü ilə neft-qaz yataqlarının işlənməsinə və enerji resurslarının Qərbə nəqlinə dair müqavilələr imzalandı. Bu da müstəqilliyin möhkəmlənməsinə və iqtisadi inkişafa gətirib çıxardı. Prezident İlham Əliyev öz siyasətini həmin nailiyyətlər üzərində qurdu. 2006-cı ildən başlayaraq ÜDM iki dəfə artdı, yoxsulluğun səviyyəsi azalaraq 49 faizdən 6 faizə düşdü".

M.Brayzə yazır ki, Azərbaycan təhlükəsizlik sahəsində ABŞ-la həmişə əməkdaşlıq edib: "Azərbaycan 11 sentyabr terror aktından sonra 24 saatdan az müddət ərzində öz hava məkanını təklif etdi və sonralar Əfqanıstanda koalisiya qüvvələrinə qeyri-döyüş materiallarının üçdəbir hissəsinin göndərildiyi mühüm dəhlizə çevrildi". 

Məqaləsini yekunlaşdıran M.Brayza Avropanın və İsrailin enerji təhlükəsizliyinin təmin olunmasına Azərbaycanın töhfəsini və regionun tolerant ölkəsi kimi onun rolunu vurğulayıb.

ANN.Az