“Rusiya və NATO nə qədər ağılsız ola bilər ki...”

 

Bu barədə Axar.az-a Şərq-Qərb Araşdırmalar Mərkəzinin rəhbəri, politoloq Ərəstun Oruclu açıqlama verib. O bildirib ki, Rusiya və NATO arasında müharibəyə heç bir əsas yoxdur:

 

"Bu, diplomatik hədə-qorxular bundan öncə də var idi. Hazırda Rusiyanın əlində olan yeganə etibarlı vasitə onun gücüdür. Ən azından Rusiyada belə hesab edirlər. NATO isə Rusiyadan nəinki zəif, hətta mən deyərdim ki, hərbi cəhətdən qat-qat güclüdür. İndi həmin o amil işə salınıb. Bir-birinə müharibə, güc tətbiq etmək hədələri ilə təsir etməyə çalışırlar. İstər NATO ölkələri, istərsə də Rusiya nə qədər ağılsız ola bilər ki, öz aralarında müharibəyə başlasınlar. Bunun üçün heç bir səbəb də yoxdur. Ukrayna amilindən söhbət gedirsə, bu, səbəb deyil. Ukraynada situasiya az-çox bəllidir. Bəlkə Rusiya həddindən artıq dərin böhran vəziyyətinə düşsə və NATO-nun Şərqi Avropadakı, yaxud da Baltik dənizi hövzəsindən keçməklə Alyansa üzv olan ölkələrə təzyiq edərsə, o zaman müharibə qaçılmaz ola bilər. Ancaq güman etmirəm ki, Rusiya bu addımları atsın. Çünki Moskva öz potensialına çox yaxşı bələddir. Əslində NATO ilə Rusiya arasında çoxdan bir müharibə başlayıb. Bu, psixoloji müharibədir”.

 

Qeyd edək ki, son zamanlar Rusiya və NATO tərəfindən beynəlxalq gərginliyi artıracaq müharibə anonsları get-gedə daha kəskin hal alır.