Leontyev: İlham Əliyev Şevarnadze deyil

Oxu.Az xəbər verir ki, bunu rusiyalı politoloq Mixail Leontyev "Vesti FM”in canlı efirində bildirib.

Azərbaycan prezidenti İlham Əliyevin bir müddət əvvəl Avropa İttifaqının ünvanına səsləndirdiyi kəskin bəyanatın nə ilə əlaqədar ola biləcəyi sualını cavablandıran politoloq bildirib ki, bu, Brüsselin hərəkətlərinə qanunauyğun və özünü doğrultmuş bir reaksiya idi.

"Bu o deməkdir ki, Azərbaycanın rəhbərliyi Avropadan gələn tamamilə açıq, anti-Azərbaycan təbliğat fəaliyyətini aşkarlayıb. Yəqin onlar qapalı xarakterli fəaliyyət barədə də məlumatlıdırlar, çünki adətən bütün bunlar bir paketdə gəlir”, - deyə, o, qeyd edib.

"Yəqin Azərbaycan yoldaşları çox heyfsləndirib. Yəqin onlar gözləyirdilər ki, Azərbaycan Rusiyadan uzaqlaşacaq. Ermənistanla münaqişə iki ölkənin arasını vurmaq üçün çox rahat və etibarlı alətdir. Onlar narazıdırlar, çünki daha çox şey istəyirdilər. Onlar Şevarnadzeni devirən insanlardır, halbuki Şevarnadze onların qarşısına çıxır, əməkdaşlığa hazır olduğunu göstərirdi, əvəzində isə belə "çox sağ ol” aldı. İlham Əliyev Şevarnadze deyil, loyallıq dərəcəsi çox aşağıdır. Niyə də qurdalamasınlar?”, - deyə, politoloq bildirib.

Bununla yanaşı, politoloq Qərbdə hansısa xüsusi marağın yaranacağını istisna etmir, "çünki indi onlara Rusiyanın ətrafında satellitlər, yəni tamamilə marionet dövlətlər lazımdır, çünki Rusiyaya qarşı boğma siyasəti həyata keçirilir”.

Lakin ekspertin fikrincə, Bakıya qarşı bu istiqamətdə atılan addımlar əvvəlcədən uğursuzluğa düçar olacaq:

"Bizim çoxlu sayda problemlərimiz və xeyli dərəcədə hansısa sahələrdə rəqib olmağımıza baxmayaraq, Azərbaycan daim özünü Rusiyaya münasibətdə son dərəcə düzgün aparıb”, - deyə, Mixail Leontyev qeyd edib.