Əli Həsənov xəbər agentliyini ittiham etdi - AÇIQLAMA

Prezident Administrasiyasının ləğv olunan İctimai-siyasi məsələlər şöbəsinin müdiri Əli Həsənovun ailəsinə məxsus 7 şirkətin ləğv olunması ilə bağlı xəbər vermişdik.

Məsələ ilə bağlı Əli Həsənov "facebook” profilində açıqlama verib. O bildirilib ki, KİV-də paylaşılan məlumatın heç bir ictimai yükü yoxdur:

"Bir qədər əvvəl Azərbaycanın bütün xəbər saytları "Report” İA-nın hazırladığı və faktiki olaraq heç bir ictimai yükü olmayan, lakin mənim adımı xüsusi qeyd edərək, məlumata sensasiyalı bir yük verdiyi materialı kütləvi şəkildə tirajlamışlar. Əslində,  bu materialda Vergilər Nazirliyinin yaydığı  adi bir elandan başqa heç nə yoxdur.  Nazirliyin öz xətti ilə xidməti məlumat kimi yaydığı həmin elanda söhbət ayrı-ayrı vaxtlarda mənə yaxın şəxslər tərəfindən qeydiyyatdan keçirilmiş və heç bir fəaliyyəti olmayan strukturların, hazırda bağlanması haqqında müraciətindən gedir”.

Qeyd edək ki, İqtisadiyyat Nazirliyi yanında Dövlət Vergi Xidmətinin "Vergilər” qəzeti Fikrət Əmirov küçəsi, ev 1 ünvanında yerləşən "Bakı 24” MMC, "Kaspi AZ” MMC, "Mətbuat Evi” MMC, "Golden Prince” MMC, "Global Advertisment” MMC və "Kaspi Co” MTK, həmçinin Mətbuat prospekti  ev 25, mənzil 38 ünvanında yerləşən "Kaspi Food" MMC-nin ləğv olunması haqqında məlumat yayıb. 

Məlumata görə, kreditorlar 2 ay ərzində tələblərini şirkətlərin dövlət qeydiyyatına alındığı Bakı şəhəri, Səbail rayonu, Fikrət Əmirov küçəsi, 1 və Yasamal rayonu, Mətbuat prospekti  ev 25, mənzil 38 ünvanlarına bildirə bilərlər.

Xatırladaq ki, adları çəkilən kommersiya qurumlarına əsasən, Ə.Həsənovun oğlu Şamxal Həsənli və yaxın qohumu Azər Vəliyev rəhbərlik edir.

"BAKI 24" MƏHDUD MƏSULİYYƏTLİ CƏMİYYƏTİ - Nizamnamə kapitalı 10.00 AZN, qanuni təmsilçisi ŞAMXAL HƏSƏNLİ ƏLİ OĞLU

"KASPİ CO" MƏNZİL TİKİNTİ KOOPERATİVİ - Nizamnamə kapitalı 100.00 AZN, qanuni təmsilçisi AZƏR VƏLİYEV KALAM OĞLU

"MƏTBUAT EVİ” MƏHDUD MƏSULİYYƏTLİ CƏMİYYƏTİ - Nizamnamə kapitalı 20.00 AZN, qanuni təmsilçisi ŞAMXAL HƏSƏNLİ ƏLİ OĞLU

"KASPİ-AZ" MƏHDUD MƏSULİYYƏTLİ CƏMİYYƏTİ - Nizamnamə kapitalı 20.00 AZN, qanuni təmsilçisi AZƏR VƏLİYEV KALAM OĞLU

"GLOBAL ADVERTİSEMENT" MƏHDUD MƏSULİYYƏTLİ CƏMİYYƏTİ - Nizamnamə kapitalı 10.00 AZN, qanuni təmsilçisi ŞAMXAL HƏSƏNLİ ƏLİ OĞLU

"GOLDEN PRİNCE" MƏHDUD MƏSULİYYƏTLİ CƏMİYYƏTİ - Nizamnamə kapitalı 300.00 AZN, qanuni təmsilçisi AZƏR VƏLİYEV KALAM OĞLU