İlham Əliyev Milli Paralimpiya Komitəsini təbrik edib

Prezident İlham Əliyev Azərbaycan Milli Paralimpiya Komitəsinin yaradılmasının 30 illiyi münasibətilə qurumun üzvlərini təbrik edib.

Təbrik məktubunda 1996-cı ilin fevralında Ümummilli Lider Heydər Əliyevin təşəbbüsü ilə Milli Paralimpiya Komitəsinin təsis edilməsinin ölkədə paralimpiya hərəkatının sistemli inkişafı üçün zəmin yaratdığı bildirilib.

Dövlət başçısı Azərbaycanda idmanın və sağlam həyat tərzinin təşviqinin dövlət siyasətinin prioritet istiqamətlərindən olduğunu vurğulayıb. Qeyd edib ki, əlilliyi olan şəxslərin sosial müdafiəsinin gücləndirilməsi və idman infrastrukturunun inkişafı paralimpiyaçıların nailiyyətlərinin artmasına şərait yaradıb.

Prezident məktubunda paralimpiyaçıların Paralimpiya Oyunlarında, dünya və Avropa çempionatlarında qazandıqları uğurları onların yüksək peşəkarlığının, iradəsinin və əzmkarlığının göstəricisi kimi dəyərləndirib.

İlham Əliyev əminliyini ifadə edib ki, Milli Paralimpiya Komitəsi bundan sonra da ölkədə paralimpiya hərəkatının inkişafına və beynəlxalq idman arenalarında Azərbaycan bayrağının yüksəldilməsinə töhfə verəcək.

Dövlət başçısı paralimpiyaçıları və bu hərəkatın inkişafında əməyi olan hər kəsi təbrik edərək onlara yeni qələbələr arzulayıb.