Rasim Əliyevin ölümü Azərbaycan futbolunun nüfuzuna necə təsir edəcək? - AÇIQLAMALAR

 

 

 

 

 

 

İdman mütəxəssisi, ekspert Rövşən Binnətli ANN.Az-a açıqlamasında bildirib ki, baş vermiş faciə hazırda araşdırılır, amma Azərbaycan adına çox üzücü hadisənin baş verməsi və insidentin futbol çərçivəsini aşaraq, beynəlxalq müstəviyə çıxması hər birimizin ürəyini ağrıdan, ciddi narahat edən təkzibolunmaz faktdır: "Bütün bunlar, təbii ki, ölkə futboluna və futbolçularına münasibətdə soyuqluq yaradır, inamı zəiflədir. Lakin söhbət təkcə azarkeşlərin münasibətindən getmir, elə futbolçuların özləri üçün də oynamaq çətindir. "Qəbələ” - "Qarabağ” görüşündən sonra mətbuat konfransında Ağdam təmsilçisinin baş məşqçisi Qurban Qurbanovun bunu etiraf etməsi deyilənlərə sübutdur”.

Ekspert vurğulayıb ki, zənnimcə, təkcə "Qəbələ”yə deyil, klubların hamısına müraciət olunmalı, ciddi xəbərdarlıq edilməlidir ki, futbolçular, eləcə də klub rəsmiləri sosial şəbəkələrdəki fəaliyyətlərində, rəylərə münasibətdə müəyyən həddi, ölçüləri gözləsinlər: "Necə olur ki, futbolçulara icazəsiz müsahibə vermək qadağan edilir, bəzi hallarda bu, hətta müqavilədə əksini tapır, amma onlara sosial şəbəkələrdə azadlıq verilir?! Sosial şəbəkələrdə də müəyyən qadağalar tətbiq edilə bilər. Hazırkı şəraitdə bu, çox vacibdir. Futbolçunun, məşqçinin, yaxud klub rəsmisinin ünvanına təhqir yazılıbsa, bunun hüquqi həlli yolları var və yalnız o çərçivədə davranmaq lazımdır. Bu qandonduran hadisədə də Cavid Hüseynov problemin özfəaliyyət şəklində yox, klub rəsmilərinə müraciət edib məhkəməyə üz tutmaq yolu ilə həllini düşünsəydi, nə özü barmaqlıqlar arasına düşərdi, nə də bir gəncin həyatı nakam sonluqla bitərdi”.

 

 

Mütəxəssis Elçin Cəlilov ANN.Az-a açıqlamasında tanınmış futbolçu olan Cavid Hüseynovun bu hadisədə adının hallanmasını ölkә futbolunun iqliminә önәmli tәsir edәcәyini bildirib: "Ümumiyyətlə, analoji olaylar tez-tez olur. Azarkeşә tәzyiq vә s. barәdә çox yazılıb, amma ölçü götürülməyib. Son hadisə isə yanlış sistemin nәticәsi kimi baş verən partlayış idi”. 

İdman mütəxəssisi hesab edir ki, AFFA-nın "Qәbәlә" klubuna hansısa xәbәrdarlıq elәmәyi mümkün deyil: "Çünki klubun hadisәdә hansı rol oynadığı nә mәlumdur, nә dә istintaq sona çatıb - hәlә heç nә sübut olunmayıb, tədqiqat, araşdırma bitmәyib. Ümumiyyәtlә, bu, şәxsi zәmindә baş vermiş olaydı, klubun burda hansısa rolunu görmürәm. İstintaqın nәticәlәrini, mәhkәmәnin hökmünü gözlәyәk”.

 

 

Qol.Az xəbər portalının yazarı Ergün Seyid ANN.Az-a  açıqlamasında qeyd edib ki, Azərbaycanda olmasa da, dünya futbolunda bu tip hadisələr tez-tez baş verir: "Bu günə kimi futbolçu-azarkeş münaqişəsi, futbolçu-jurnalist qalmaqalları ilə qarşılaşmışdıq. Amma burada  pik nöqtə ölüm hadisəsinin baş verməsidir. Düşünürəm ki, futbolçunun bu hərəkəti heç də azarkeşlərin futbola olan marağını azaltmayacaq. Bir insanın əməlinə görə hamını günahlandırmaq düzgün deyil axı.  Təsəvvür edin ki, bu hadisə əksinə də ola bilərdi. Yəni Cavid Hüseynov və ya onun qohumu ilə jurnalist arasında olan qalmaqalda futbolçu ölsəydi, buna görə bütün jurnalistikanı günahkar saymaq düzgün olardımı? Bu gün Cavid Hüseynova haqq verənlər də var, onun hərəkətini qınaq obyektinə çevirənlər də. Nəticə odur ki, istər-istəməz Azərbaycan futbolu bu gün ən çox danışılan və müzakirə olunan mövzulardandır”. 

İdman yazarının sözlərinə görə, bu hadisə bir yandan valideyinləri və futbolçu yetişdirən müəllimləri  də diqqətli olmağa vadar edəcək: "Həmçinin məşqçilər də anlamaldırlar ki, onların vəzifələri futbolçulara çıxıb meydana ancaq topun arxasınca qaçın, qələbə qazanın deməklə bitmir.  Futbolçuları bütün istiqamətlərdə - həm idman, həm psixoloji, həm əxlaqı və s. hazırlamaq məşqçilərin borcudur. Bundan sonra klub rəhbərlərinin də öz işlərində məsuliyyətli olacaqlarına inanıram”.

"Qəbələ” futbol klubuna AFFA tərəfindən hər hansı xəbərdarlıq olunması məsələsinə gəlincə, idman yazarı cavab verib ki, klubun burda heç bir günahı yoxdur:  "Qəbələ” klubuna hansısa bir xəbərdarlıq edilməyəcək. Çünki onların burda heç bir günahı yoxdur. Onlar istəyərdimi Avropa Liqasında çox vacib oyun öncəsi adları belə bir hadisə ilə hallandırılsın? Təsəvvür edin, bizə yuxu kimi gələn bir vəziyyət onlara necə təsir edib? Onsuzda klub hazırda furbolçuların psixoloji durumunun yaxşılaşdırılması üçün çətinlik çəkir. Çünki Avropada mübarizə apardıqları 3 klubdan ikisi ilə problem yaşandı.  Son olaylar isə artıq kluba gələn ən böyük bəla oldu”.

Ergün Seyid hesab edir ki, biz təkcə jurnalist itirmədik: "Azərbaycan futbolunun illərlə yetişdirdiyi  bir futbolçu da öz ağılsızlığından məhv oldu”.

Xatırlaqdaq ki, jurnalist Rasim Əliyev avqustun 8-də futbolçu Cavid Hüseynovun qohumları tərəfindən döyülüb. Avqustun 9-da gecə saatlarında vəziyyəti daha da pisləşən Rasim Əliyev cərrahiyyə əməliyyatı olunsa da, hazırda ictimaiyyətə tam məlum olmayan səbəblərdən vəfat edib. Həkimlərin ilkin rəyinə görə, onun dalağı və mədəaltı vəzisi partlamış, daxili qanaxma baş vermişdi. Bu hadisədən sonra prezident İlham Əliyev Rasim Əliyevin ölüm hadisəsini şəxsi nəzarətinə götürüb. Aparılan araşdırmalardan sonra ölüm faktı ilə əlaqədar artıq 6 nəfər həbs edilib. 

Qeyd edək ki, həbs olunanlardan biri Elşən İsmayılov futbolçu Cavid Hüseynovun bibisi oğludur. O, 2013-cü ilin iyul ayının 20-i perspektiv vəd edən futbolçu kimi "Qəbələ"nin əvəzedici komandasına cəlb olunub,  6 ay əvəzedicilərin heyətində qalıb, ümidləri doğrultmadığına görə komandadan uzaqlaşdırılıb. 

Rasim Əliyevi döyənlər arasında daha biri futbolçunun olması ehtimalı da var. Hazırda rəsmi qurumlar tərəfindən təsdiq olunmasa da, 1995-ci il sentyabrın 18-də doğulmuş Camal Məmmədovun "Neftçi"nin sabiq yetirməsi olduğu bildirilir və əvvəllər "Xəzər Lənkəran", "Rəvan" və "Simurq"un əvəzedici komandasında çıxış edib. Müdafiəçi olan Camal ötən mövsüm "Turan Tovuz" kimi tanınan komandada oynayıb.