"Qarabağ"dan növbəti transfer

"Qarabağ" növbəti transferini gerçəkləşdirib.

Qol.Az-ın əldə etdiyi məlumata görə, Ağdam təmsilçisi ispan futbolçu Mikel Markos Maderanı transfer edib.

29 yaşlı dayaq yarımmüdafiəçisi ilə iki illik müqavilə imzalanıb. Artıq həm Maderanın, həm də klubun digər yeni transferi, hücumçu Samuel Armenterosun adı Avropa Liqasının qrup mərhələsinin oyunları üçün UEFA-ya sifariş olunub.

Karyerası ərzində "Sportinq Xixon", "Hetafe" (hər ikisi İspaniya), "Birmingem" (İngiltərə) və AEK (Yunanıstan) komandalarında oynayan Madera ötən mövsümü İsrailin "Makkabi" (Hayfa) klubunda keçirib.

Qeyd edək ki, "Qarabağ" daha bir futbolçunu transfer etməyə yaxındır. Bu, Makedoniya millisinin üzvü Vladimir Dimitrovskidir. Lakin Makedoniya Futbol Federasiyası futbolçunun transfer vərəqəsini "Qarabağ"a göndərmədiyi üçün hələlik bu keçid rəsmiləşməyib.