Rövnəq Abdullayev Petkim yarımadasında olub - Fotolar

SOCAR prezidenti Rövnəq Abdullayev Petkim yarımadasında olub.
                               
SOCAR-dan ANN.Az-a verilən məlumata görə, Dövlət Neft Şirkətinin prezidenti Rövnəq Abdullayev, SOCAR-ın vitse-prezidentləri Süleyman Qasımov, Elşad Nəsirov, Bədəl Bədəlov, Sərmayələr İdarəsinin rəisi, "SOCAR Türkiyə” İdarə Heyətinin sədri Vaqif Əliyev, İzmirin Əliağa bölgəsində Petkim yarımadasında həyata keçirilən investisiya layihələrinin gedişi ilə maraqlanıblar. SOCAR rəhbərliyinə 30 faiz tikinti işləri yekunlaşmış STAR Neft Emalı Zavodu, oktyabr ayında birinci fazası yekunlaşacaq Petlim Limanı və cari ilin ilk 6 ayında xalis gəliri 232 milyon Türk lirəsi həcmində olan "Petkim”lə əlaqədar təqdimatlar nümayiş etdirilib. Rövnəq Abdullayev aldığı məlumatlardan sonra görülən işlərlə bağlı fikirlərini bildirib, qeyd edib ki, ''Petkim” neft-kimya kompleksində ilin birinci yarısı olduqca müsbət göstəricilərlə yekunlaşmış və məhsuldarlıq yüksək səviyyəyə çatdırıb. STAR Neft Emalı Zavodunda işlər qrafikə uyğun davam etdirilir ki, bu da təqdirəlayiq halqdır. SOCAR prezidenti Petlim Limanının yaxın vaxtlarda istismara başlayacağına əminliyini bildirmiş və qeyd etmişdir ki, bu layihədə zaman faktorundan səmərli yararlanmaq bizim üçün mühüm nailiyyətdir.

Təqdimatlardan sonra Rövnəq Abdullayev və onu müşayiət edən şirkət rəhbərliyinin nümayəndələri STAR Neft Emalı Zavodunun laboratoriya binasının təməlqoyma mərasimində iştirak ediblər. Mərasimdən sonra SOCAR rəhbərliyi liman sahəsində tikilən 300 metr uzunluğundakı dalğaqırana və 700 metr uzunluğundakı bərəyə baxış keçiriblər.


www.ann.az