Prosineçki: "Azərbaycan millisindən ayrılmağı düşünmürəm"

"Avro-2016"nın seçmə mərhələnin son iki turunda uğursuz nəticə ilə diqqət çəkən Xorvatiya yığmasının baş məşqçisi Niko Kovaçın istefaya göndəriləcəyi iddia olunur. 

Qol.Az-ın məlumatına görə, Xorvatiya millisinin baş məşqçi vəzifəsinə əsas namizədlərdən biri də yığmamızın çalışdırıcısı Robert Prosineçkidir. 

Lakin 46 yaşlı mütəxəssis ölkəsinin mətbuatına açıqlamasında Azərbaycan millisindəki vəzifəsindən ayrılmağı düşünmədiyini bildirib. 

- Görürəm, indi hər kəs Niko Kovaçın Xorvatiya yığmasından gedəcəyi haqda danışır. Ancaq bir neçə gün əvvəl hər şey qaydasında idi və komandanın böyük potensialının olduğu deyilirdi. Məgər indi elə deyil? Təəssüflər olsun ki, bu problem təkcə Xorvatiyada deyil, bütün dünyada belədir. Komanda qələbə qazana bilməyən kimi, tənqidlər başlayır. 

  

- Hər kəsə təşəkkür edirəm. Lakin Azərbaycan millisindən ayrılmağı düşünmürəm. Cəmi 8 aydır ki, burada çalışıram. Azərbaycan yığması ilə iki illik müqaviləm var. Burada olan şəraitdən razıyam. Düşünürəm ki, onlar da gördüyüm işlərdən və son nəticələrdən narazı deyillər. Seçmə mərhələnin son 4 oyununda uduzmamışıq. Komanda inkişaf edir və biz daha yaxşı oynayırıq. Düzdür, ən yaxşı formadan uzaqdırlar, ancaq mən onlardan razıyam. 

- Xorvatiya yığmasını çalışdırmağı kim istəməz? Amma yenə təkrar edirəm, mən Azərbaycan yığmasında çalışıram və oradan getməyi düşünmürəm. Bundan əlavə, Niko Kovaç hələ də işinin başındadı. Əgər siz dəyişikliyin qaçılmaz olduğunu düşünürsüzsə, fikrimcə, federasiya rəhbərliyi ən doğru qərarı qəbul edəcək. Mən isə öz işimə baxıram.

- Əlbəttə, İtaliya ilə görüşdə komandam bütün gücünü ortaya qoyacaq. Düzdür, onlar elə də baxımlı oyun sərgiləmirlər, ancaq lazımi qolları vurmaqla hazırda qrupda liderdirlər. Bu görüşdən sonra Bolqarıstana səfər edəcəyik. Mənim üçün əsas prioritet dünya çempionatının seçmə mərhələsi olacaq. Xorvatiya millisinə də uğurlar arzulayıram.