Ələsgər Məmmədli: “Əslində Adəm Məmmədovun belə çıxış etməsi müvəkkilinin vəziyyətini ağırlaşdırır”

Vəkil məhkəmə hökmü olmadan C.Hüseynovun cinayətkar kimi qələmə verilməsindən narazılığını ifadə edib və hüquqlarını müdafiə etdiyi şəxsin günahsız olduğunu bildirib.

Əgər məhkəmə hökmü olmadan birisini qatil adlandırmaq düzgün deyilsə, eyni məntiqlə məhkəmə qərarı yoxdursa, vəkil hansı əsaslara görə şübhəli şəxs qismində saxlanılan adamı günahsız elan edir? Vəkil belə açıqlama verə bilərmi? Bu şübhəli şəxs qismində saxlanılan adamın, haqqında həbs-qətimkan tədbiri seçilən birisinin təmizə çıxarılması üçün ictimaiyyətə təzyiq kimi başa düşülə bilərmi?

Hüquqşünas Ələsgər Məmmədli ANN.Az açıqlamasında qeyd edib ki, vəkil Adəm Məmmədovun belə çıxışlar etməsi müvəkkilini huquqlarını qorumaqdan daha çox onun cəmiyyətdəki mövqeyini qorumağa xidmət edir: "Adəm Məmmədov bundan öncə mərhum jurnalist Rasim Əliyev haqqında vəkilə yaraşmayan, ümumiyyətlə hüquq sisteminə yaraşmayan ifadələr işlətmişdi. Əslində Adəm Məmmədovun belə çıxış etməsi müvəkkilinin vəziyyətini daha da ağırlaşdırır. Hansısa mətbuat orqanında Cavid Hüseynovun qatil adlandırılması ilə bağlı yazı yoxdur. Ola bilsin bu cəmiyyətdə insanlar arasında deyilən söz olsun, yaxud Rasim Əliyevin valideynlərinin ehtimalı”. 

Hüquqşünas hesab edir ki, Konstitusiyanın 63-cü maddəsinə görə hər kəsin təqsirsizlik prezumpsiyası hüququ var: "Düzdür, məhkəmə qərarı olmadan heç kimi qatil, cinayətkar adlandırmaq düzgün deyil. Yadda saxlamaq lazımdır ki, mərhum jurnalist Rasim Əliyev ifadə azadlığının qurbanı oldu. Yəni jurnalist sərbəst şəkildə fikir bildirdiyinə görə döyülərək öldürüldü. Bununla əlaqədar da artıq cinayət işləri davam etdirilir. Vəkil Adəm Məmmədovun müvəkkili birdəfəlik günahsız adlandırmasına cavab olaraq deyə bilərik ki, ən azından futbolçu Cavid Hüseynovun mərhum jurnalist Rasim Əliyevlə telefon danışıqları var. Bütün bunlar da istinaq tərəfindən araşdırılır. Yəni Cavid Hüseynovu tam günahsız adladırmaq düzgün deyil, çünki o, şübhəli şəxs qismində saxlanılıb. Gühansız olduğu deyilə bilər, ancaq tam şəkildə günahsızdır demək olmaz. Məhkəmə qərarından sonra tam əmimliklə deyə biləcəyik ki, kim günahkardır, kim günahsız”.

Ələsgər Məmmədli əlavə edib ki, vəkilin bu çıxışını cəmiyyətə qarşı təzyiq kimi qiymətləndirmək düzgün olmaz: "Çünki cəmiyyətdə mərhum jurnalist Rasim Əliyevin döyülərək öldürülməsini qəbul edənlər kimi Cavid Hüseynovun da günahsız olduğunu düşünənlər var. Necə deyərlər, cəmiyyətdə hər iki tərəfin tərəfdarları var və bu da təbiidir”.

Mərhum Rasim Əliyevin anası Teyfurə Əliyeva ANN.Az-a açıqlamasında "hər bir  vəkilin vəzifəsi müvəkkilini müdafiə etməkdir” fikri ilə razılaşdığını deyib: "Amma mənim gözlərim qarşısında baş verənlərin -  yəni Cavidin Rasimə dəfələrlə zəng etməsinin şahidi olmuşam. Hətta Caviddən sonra onun bibisi oğlu da Rasimə zəng etmişdi. Bu danışığında şahidi mənəm. Mənim israr etməyimə baxmayaraq, Rasim həmin şəxslərin şirin dilinə, yalan sözlərinə aldanıb, onlarla görüşə tək getdi”.

Mərhumun anası qeyd edib ki, məhkəmə şahidlərin sözlərinə inanır, onlara istinad edib müttəhim haqqında qərar çıxarır: "Mən bu hadisənin ən böyük şahidiyəm. Bütün hadisələr mənim  gözümün qabağında baş verib. Ümid edirik istintaq zamanı bütün bunların hamısı nəzərə alınacaq. Tək ümidimiz bu işin ölkə başçısı İlham Əliyev tərəfindən nəzarətdə olunmasındadır. Çünki bu işin ətraflı araşdırlması ilə bağlı o lazımi orqanlara tapşırıqlarını verib. Biz də ona inanırıq”.