Prezident: Bakıda təmirsiz məktəb qalmayacaq

Bakı şəhərində bu il 10-dan çox məktəb əsaslı şəkildə təmir edilib və tikilib. Son illər ərzində Bakıda 250-dən çox məktəb yenidən qurulub, tikilib, təmir olunub. Bakıda məktəblərin sayı 300-dən yuxarıdır. Bu proses davam edir. Əminəm ki, yaxın bir-iki il ərzində Bakıda təmirsiz məktəb qalmayacaq.

Ölkəmizdə də işlər yaxşı gedir, məktəblər tikilir. Son 10 ildə bölgələrdə 3 mindən artıq məktəb tikilib.

Oxu.Az xəbər verir ki, bu sözləri Azərbaycan prezidenti İlham Əliyev Bakının Sabunçu rayonundakı 148 nömrəli tam orta məktəbin müəllim və şagird kollektivi ilə görüşdə deyib.

Dövlət başçısının sözlərinə görə, təhsilin maddi-texniki bazası möhkəmlənir və təhsilin keyfiyyəti də artır və daha da artmalıdır. 

"Belə gözəl məktəbdə nəticələr də daha yaxşı olmalıdır, çünki təhislin səviyyəsi hər bir ölkənin ümumi səviyyəsini şərtləndirir.  O ölkələr sürətlə inkişaf edir ki, orada insanlar biliklidir, savadlıdır. Bizdə savadlılıq ən yüksək səviyyədədir, haradasa 100%-ə yaxındır. Hesab edirəm ki, bu böyük nailiyyətdir. 

Lakin dünyada gedən elmin inkişafı, texnoloji inkişaf, yeni texnologiyaların yaranması bizdən də tələb edir ki, öz inkişafımızı dünyada gedən tendensiyalarla uyğunlaşdıraq. Burada təhsilin səviyyəsi ən başlıca şərtdir. Bizim gənclərimiz bilikli, savadlı olmalıdırlar ki, gələcəkdə həyatda özləri üçün layiqli yer tutsunlar və ölkəmizin inkişafına öz töhfələrini versinlər”, - İlham Əliyev deyib.