“Seçkinin müşahidə edilməməsi Azərbaycanın beynəlxalq təşkilatlar yanındakı nüfuzuna təsir göstərəcək” - EKSPERT

Ekspert Azərbaycanın Avropa Şurasına üzv olduqdan sonra 2001-ci ildən bəri Seçki Məcəlləsində seçki keçirilməsində öhdəliklər götürdüyünü qeyd edib: "Demək olar ki, Azərbaycanla Avropa Parlamenti, Avropa Şurası arasında Seçki Məcəlləsinə, digər qanunvericiliyə dəyişiklik edilməsi ilə əlaqədar danışıqlar gedir. Amma təəssüf ki, Azərbaycanda son illər, xüsusilə 2008-ci ildən seçki qanunverciliyinə edilən dəyişikliklərin böyük əksəriyyəti əks effektə çevrilib. Seçki qanunvericiliyinə edilən dəyişikliklərin böyük əksəriyyəti seçki müddətinin qısaldılması, məsələn, təbliğat dönəmində 60 gün idi, hazırda 23 gündür, seçkilərdə qeydiyyat məsələsi daha da sadələşdirilmiş formada həyata keçirilirdi, indi isə daha da çətinləşdirilib. Yəni həm qanunvericilik nöqteyi-nəzərdən, həm seçkilərin keçirilməsi baxımından hər seçkilərdən sonra Azərbaycan-Avropa İnstitutları tərəfindən tövsiyyələr  verilirdi. Azərbaycanın bu tövsiyyələri yerinə yetirilməsinə çağrılırdı. Amma buna baxmayaraq çox əfsuslar olsun ki, Azərbaycanla Avropa İnstituları arasında bu səbəbdən də bəzi anlaşılmazlıqlar olurdu. Getdikcə bu problemlərdə daha kəskinləşirdi və bu səbəbdən də Avropa qurumları Azərbaycana qarşı hər dəfə yerinə yetirəcəyi öhdəlikləri xatırladırdılar”.

Avropa ilə Azərbaycan arasında münasibətlərin getdikcə pisləşdiyini deyən ekspert əlavə edib ki, ATƏT-in ənənəvi tərəfdaşı olan DTİHB-nin Azərbaycanda keçiriləcək parlament seçkilərini müşahidə etməmələri bu siyasi hadisənin legetimliyinə, onun nəticələrinin beynəlxalq aləmdə tanınması ilə bağlı ciddi suallar doğuracaq: "Çünki ATƏT-in DTİHB-u çox nüfuzlu bir təşkilatdır. Həm Avropada, həm də dünyada kifayət qədər nüfuza malikdir. Bu təşkilatın seçkilərdə iştirak etməməsi Azərbaycanın beynəlxaq təşkilatlar yanındakı nüfuza çox böyük təsir göstərəcək. Bu gələcəkdə böyük maneələr yaradacaq. Bu maneələrin ən birincisi özünü 2016-ci ilin yanvar ayında keçiriləcək AŞPA-nın növbəti iclasında daha çox biruzə verəcək. O vaxta qədər Milli Məclisə yeni seçilmiş deputatlarının AŞPA təmsilçiləri artıq təsdiq olunacaqlar. Təsdiq prosesində ilk maneələr çox güman ki, üzə çıxacaq”.

Ekspert hesab edir ki, əslində Azərbaycan tərəfinin irəli sürdüyü arqumentlər, yəni 400 müşahidə heyətinin çox olması fikrimcə ciddi əsaslar deyil: "Seçkiləri müşahidə etmək üçün 400-ə yaxın müşahidə heyətinin gəlməsi planlaşdırılsa da Azərbaycan tərəfi 150 müşahidəçini qəbul edəcəkləri haqqında fikir bildirmişdi. Azərbaycan tərəfinin əslində özünü maraqları olmalıdır ki, kifayət qədər müşahidəçi gəlsin. Çünki seçkilərin şəffaf olması üçün Avropa deyil, Azərbaycan tərəfi özü heç bir qayda pozuntusunun, saxtakarlığın olmamasını istəməli və bunu təsdiq edən müşahidəçilərin çox olmasında maraqlı olmalıdır”.