Hasarlanan "Bolluq bazarı" - FOTOLAR

Bu günlərdə yolum həmin əraziyə düşmüşdü. Məqsədim bazarın hazırkı durumu, eləcə də orada işləyən satıcıların sonrakı aqibəti barədə məlumatlar əldə etmək idi. 

Əraziyə çatıb bir sağıma baxdım, bir soluma... Amma deyildiyi kimi, heç bir söküntüyə rast gəlmədim. Yanlış məkana gəldiyimi zənn edib yaxınlıqda dayanan yerli sakinlərin birindən bazarın yerini soruşdum. Kişi hasarlanmış bir yeri göstərib söküntü yerinin bir neçə müddətdir ki, hasarlandığını bildirdi. 

Hasarlanan ərazinin o qədər də geniş olmayan qapısından içəri keçdim. Bir dənə də salamat tikinti, bina yox idi, hamısı sökülüb yerlə yeksan edilmiş, hər tərəf töküntü halında olan daş-kəsəklə dolu idi. Ərazinin yuxarı hissəsində salamat qalmış qapı-pəncərə sexindən səs gəldiyini görüb ora yönəldim. Obyekt sahibindən bazar və onun pərən-pərən düşmüş satıcıları barədə məlumatlar öyrənmək istədim. 

Həyatından çox razı insan təsiri bağışlayan kişi bazarın onsuz da sökülməli olduğunu, satıcıların isə başqa məkanda işlə təmin edildiklərini bildirdi. Kişidən onlardan heç olmasa bir neçəsinin ünvanını öyrənmək istəsəm də, dəqiq bir xəbər öyrənmək mümkün olmadı. Ərazinin hansı şirkətə məxsus olması, ondan hansı məqsədlər üçün istifadə ediləcəyini soruşduqda obyekt sahibi "çox dərinə getmə bala, başın ağrıyar” deyərək məkanına girib qapının dalında görünməz oldu...

 

Mən gördüklərimi kameranın yaddaşına köçürməklə işimi yekunlaşdırmaq istədim.