Avtovağzal ətrafındakı sürüşmə genişlənib

"Avtovağzal rəhbərliyinin "qaynar xətt”ə müraciət əsasında hazırda sürüşmə zonasına baxış keçiririk”. Bu sözləri Modern.az-a açıqlamasında Ekologiya və Təbii Sərvətlər Nazirliyinin Milli Geoloji Kəşfiyyat Xidmətinin Geoloji Planlama Ekspedisiyasının baş geoloqu Ələmdar Piriyev deyib. O qeyd edib ki, əraziyə baxış zamanı çökmə prosesinin davam etdiyi, çatların genişləndiyi aşkar olunub.

"Çökmə prosesi davam edir, çatlar genişlənib və müəyyən qədər də oturub. Oturmanın hündürlüyü 15 sm-dən artıqdır. Proses dayanmayıb və az da olsa oturmanın dinamikasında fəallaşma gedir”.

Ə.Piriyev qeyd edib ki, çökmənin qarşısını almaq üçün bərkitmə işlərinin aparıldığını bildirib.

"Bərkitmə işləri aparıldıqdan sonra çökən hissələr doldurulacaq və  sonra yəqinki üstü asfaltlanıb həmin yol açılacaq. Xarici vizual görünüşdə təhlükə olmamalıdır. Betonun içərəsində bilmirik ki, armaturlar nə yoğunluqdadır və qalınlığı nə qədərdir. Ola bilər ki, armaturlar nazik olsun səhərisi gün problem yaransın. Ola da bilsin ki, qalın armaturlar olsun və heç bir təhlükə olmasın. Yəni betonun konstruksiyasının keyfiyyətliliyini bilmirik ki, sabah dözəcək ya yox. Rəhbərliklə də görüşürük, onlar bərkitmək işlərini davam etdirirlər ki, yolu açsınlar”.

Qeyd edək ki, bir neçə gün öncə Bakı Beynəlxalq Avtovağzal ərazisinə yaxın yolda çökmə olub, çatlar yaranmış və istinad divarları əyilmişdi. Çökmənin daha da genişlənməsinin qarşısını almaq üçün yolun həmin hərəkət hissəsi bağlanılıb və ərazidə bərkitmə işləri aparılıb.