"Yeni neft sazişi imzalanacaq" - XOŞBƏXT YUSİFZADƏ

X.Yusifzadə vurğulayıb ki, yeni müqavilədə SOCAR-ın pay bölgüsü bir qədər artıq olacaq. Müqavilə 2040-cı ilə qədər qüvvədə qala bilər: "Müddət daha da uzadılarsa, köhnə platformaların müəyyən qədər genişləndirilməsinə, yeni quyuların qazılmasına imkan yaranacaq. Təxminən 150 quyunun qazılacağı hesablanır, 48 quyuluq yeni platforma quraşdırılacaq". 

Vitse-prezident daha sonra əlavə edib ki, 2024-cü ildə hazırkı müqavilə bitən müddətdə 623 milyon ton neft hasilatı nəzərdə tutulur ki, bu da ümumi ehtiyatların 28%-i qədər olacaq: "2060-cı ilədək isə 1,2 mlrd, ton neft hasil olunacaq".

Xoşbəxt Yusifzadə neft və qaz yataqlarının axtarışı üzrə işlərin davam etdiyini də deyib. Onun sözlərinə görə, dənizin dərinliklərində əsasən qaz-kondensat yataqlarıdır: "Orada neft yataqlarının kəşfi mürəkkəbdir". 

Xoşbəxt Yusifzadə əlavə edib ki, Azərbaycan artıq yenidən quruda axtarışlara qayıdır: "Orada mezozoy çöküntüləri var və bu çöküntülərdə çoxlu işlər aparılır. Hazırda SOCAR yeni texnologiyalar vasitəsilə tədqiqat işlərinə başlamaq istəyir. Bu barədə biz bir sıra xarici şirkətlərlə müqavilələr bağlamışıq. Hazırda orada tədqiqat işləri aparılır ki, gələcəkdə mezozoy çöküntülərində kəşfiyyat işlərinə başlayacaq".