Naxçıvanda da gömrük prosedurları asanlaşdırıldı

Naxçıvanda gömrük proseduru sadələşdirilib.

APA-nın məlumatına görə, Naxçıvan Muxtar Respublikası Nazirlər Kabineti bununla bağlı "Naxçıvan Muxtar Respublikasının gömrük sərhədindən keçirilən malların və nəqliyyat vasitələrinin bəyan edilməsi Qaydaları"nda dəyişiklik edib.

İndiyə qədər gömrük sərhədindən keçirilən malların kateqoriyası, malları keçirən şəxs, ixrac ölkəsi və ya malların yerləşdirildiyi gömrük proseduru nəzərə alınaraq, gömrük bəyannaməsi ilə birlikdə gömrük ərazisində məcburi sertifikatlaşdırılmalı olan mallar gömrük ərazisinə idxal edildikdə, uyğunluq sertifikatı, dövlət baytarlıq nəzarətində olan mallar gömrük ərazisinə idxal edildikdə, baytarlıq sertifikatı, yeyinti məhsulları gömrük ərazisinə idxal edildikdə, gigiyena sertifikatı, bitki və bitkiçilik məhsulları gömrük ərazisinə idxal edildikdə, idxal karantin icazəsi, ixrac edildikdə isə fitosanitar sertifikatının təqdim edilməsi tələb olunub. Dəyişikliyə əsasən, artıq bu sənədlər tələb olunmayacaq.

Eyni zamanda bundan sonra Naxçıvana spesifik malların ixracı zamanı müvafiq dövlət orqanlarının rəyləri tələb olunacaq.