BP və SOCAR arasındakı saziş enerji ehtiyatlarının artıracaq - Ekspert

"Sənəd əməkdaşlığın daha da uzunmüddətli olmasına təkan verəcək”.

Dekabrın 22-də BP və Azərbaycan Respublikası Dövlət Neft Şirkəti (SOCAR)  Xəzər dənizinin Azərbaycan sektorunda Abşeron yarımadasının ətrafındakı dayazsulu sahədə yerləşən potensial perspektiv strukturlarda birgə geoloji kəşfiyyat işlərinin aparılması və işlənməsi haqqında Hasilatın Pay Bölgüsü sazişi (HPBS) imzalayıb.

ANN.Az Oxu.az-a istinadən xəbər verir ki, bu sazişin mahiyyətini şərh edən  Neft Araşdırmaları Mərkəzinin rəhbəri İlham Şaban bildirib ki, sazişin xüsusiyyəti geoloji kəşfiyyat üzrədir və bunun məqsədi bundan sonra geoloji kəşfiyyat sahəsində addımlar atmaqdır.

"Bu da Abşeron yarımadasının cənub hissəsində dənizin 40 metr dərinliyinə qədər olan sahənin yenidən öyrənilməsi və orada olan ehtiyatların dəqiqləşdirməsi ilə bağlıdır,” - deyə, ekspert bildirib.

"Bu əməkdaşlıq çərçivəsində əgər yeni neft və yaxud qaz ehtiyatları tapılarsa, hər iki şirkət üçün birincisi əməkdaşlığın daha da uzunmüddətli olmasına təkan verəcək. İkincisi, bu saziş hər iki şirkətin enerji ehtiyatlarının artırılmasına xidmət edəcək. Bu isə hər iki şirkətin kapitalının artırılması deməkdir. Üçüncüsü də, bu, gələcək hasilatın artırılması yönümündə atılmış yeni bir addım olacaq,” – deyə ekspert bildirib.

ANN.Az