“Nabat” filmi ekranlarda

"Park Cinema”da keçirilən Avropa kinofestivalı çərçivəsində böyük uğurun ardınca Elçin Musaoğlu tamaşaçıların ixtiyarına daha bir əsəri – "Nabat” filmini təqdim edir.

Bakupost.az bildirir ki, film diyarını tərk etməyən, Qarabağ müharibəsinin bütün ağrı-acısına tab gətirməyə çalışan qoca cütlük haqdadır. Dünya kinotənqidçilərinin hörmətini qazanmış bu ekran əsəri 11 kinofestivalda heyranlıqla qarşılanıb. "Nabat” Venesiya, Milan, Çikaqo kinofestivallarında nümayiş olunub, həmçinin 2015-ci ilin Amerika "Oskar” kinoakademiyasının mükafatı uğrunda müsabiqədə iştirak edib. Almaniyanın Manheym, Heydelberq şəhərlərində keçirilən 63-cü Beynəlxalq kinofestivalda film əsas mükafat – Beynəlxalq Tənqidçilər mükafatı, eləcə də Ekumenik jürinin mükafatına layiq görülüb.

"Nabat” bədii filmi Mədəniyyət və Turizm Nazirliyinin sifarişi ilə Cəfər Cabbarlı adına "Azərbaycanfilm” kinostudiyasında çəkilib. Ssenari müəllifləri Elxan Nəbiyev, Elçin Musaoğlu, quruluşçu operator Abdulrəhim Beşarat, prodüser Müşfiq Hətəmovdur. Filmdə Fatimə Motamed Arya, Vidadi Əliyev, Ramin Zeynalov, Sabir Məmmədov, Fərhad İsrafilov, Rəhilə Məmmədova, Rövşən Ağayev, Həsənağa Səfərov çəkiliblər.

"Nabat” filmi Xocalı faciəsinin 23-cü ilinin qeyd olunduğu bu günlərdə "Park Sinema”da nümayış etdiriləcək.

ANN.Az