Hüquq müdafiəçisi ölümlə hədələndi - Azərbaycanda

Azad İstehlakçılar Birliyinin sədri Eyyub Hüseynovu ölümlə hədələyiblər.


Bunu virtualaz.org saytına açıqlamasında Eyyub Hüseynov özü bildirib.

Hüquq müdafiəçisinin sözlərinə görə, rəhbərlik etdiyi təşkilata fevralın 11-də bir şikayət daxil olub: "Şikayət edən şəxsin qolu və başı sarıqlı idi. Sarğının üzərində hətta qan izləri də vardı. Bu şəxs Sabirabad rayonunun Nizami kənd sakini Cəbrayılov Vilayət Oruc oğludur”.

E.Hüseynov dedi ki, V.Cəbrayılovun şikayət ərizəsində Nizami kənd orta məktəbində çalışan iki müəllimin saxta diplom almasından bəhs edilirdi: "Ərizədə göstərilən faktlarla bağlı həmin kəndin digər sakinlərinin münasibətini öyrəndim. Arif Həsənov adlı sakin müəllimin saxta diplomla işləməsi barədə kənd əhalisinin məlumatlı olduğunu bildirdi. Bundan sonra ərizələri Nazirlər Kabinetinə ünvanladım”.

E.Hüseynov qeyd etdi ki, şikayət ərizəsi ilə bağlı ona istinadən saytda fevralın 12-də məlumat yerləşdirilib:

"Fevralın 25-dən zəng vuraraq məni təhqir və təhdid edirlər. Hətta Bakıya gələrək öldürəcəklərini söyləyirlər. Məni ölümlə təhdid edən şəxs özünü saxta diplom almaqda ittiham olunan Lazım Cəbrayılovun və onun qardaşı Kazım Cəbrayılovun atası Ağamirkamal kimi təqdim edir”.