Kann kinofestivalında Azərbaycan pavilyonu quruldu - Fotolar

Nazirlikdən Trend-ə verilən məlumata görə, festivalda ölkəmizin nümayəndə heyəti iştirak edir. Heyətə Mədəniyyət və Turizm Nazirliyi Kino yaradıcılığı və filmlərin təbliği sektorunun müdiri Yusif Şeyxov, Cəfər Cabbarlı adına "Azərbaycanfilm" kinostudiyasının direktoru Müşfiq Hətəmov, kinoşünas, rejissor Ayaz Salayev, rejissor Asif Rüstəmov daxildir.

Milli pavilyonumuzda Azərbaycanın kinosunun müasir inkişafını, nailiyyətlərini, ölkəmizin turizm imkanlarını əks etdirən, həmçinin Bakı-2015 Avropa Oyunlarını təbliğ edən çap, reklam məhsulları nümayiş olunur.

Bu il "Azərbaycanfilm" kinostudiyasının tarixində ilk dəfə olaraq Kann festivalının kino bazarına altı ekran əsəri təqdim edilib. Bunlar "Şəhər motivləri", "Qırmızı bağ", "Yarımçıq xatirələr", "İçərişəhər", "Axınla aşağı", "Qisas almadan ölmə. Keçmişdən məktublar" bədii filmləridir.

68-ci Kann festivalının müsabiqə proqramında isə 19 film yer alıb. Kino nümayişi fransalı rejissor Emmaniel Berkonun "Başını dik tutaraq" filmi ilə açılıb. Festivalın finalında isə tamaşaçılar Lyuk Jakın "Buz və səma" filmini izləyəcəklər.

Amerikalı rejissorlar Coel və İtan Koen qardaşlarının rəhbərlik etdiyi münsiflər heyətinə məşhur aktrisalar Sofi Marso, Sienna Miller, kanadalı rejissor Ksavye Dolan, amerikalı aktyor Ceyk Cillenxol və meksikalı rejissor Qilyerme del Toro daxildir.

Festival mayın 24-də yekunlaşacaq və təntənəli mərasimdə "Qızıl palma budağı"nın sahibi və digər mükafatçılar elan olunacaq.