Prezident Avropa Oyunları üçün avtobus deposu və təlim mərkəzinin açılışında iştirak etdi

Azərbaycan prezidenti İlham Əliyev "Bakubus” MMC-nin birinci Avropa Oyunları üçün avtobus deposu və təlim mərkəzinin açılışında iştirak edib.

APA-nın məlumatına görə, dövlət başçısı deponun və mərkəzin rəmzi açılışını bildirən lenti kəsib.

Maliyyə naziri Samir Şərifov prezidentə görülən işlər barədə məlumat verib.

Qeyd edilib ki, burada bir inzibati və dörd xidməti bina inşa edilib. İnzibati binada ümumi, avtobusların və nəqliyyatın idarəetmə mərkəzləri, mühasibatlıq, treninq mərkəzinin sinifləri, yeməkxana və digər otaqlar var. Azərbaycan prezidenti "Bakubus” MMC-nin inzibati binasında, Sürücü Təlim Mərkəzində, avtobus parkında yaradılan şəraitlə tanış olub, avtobuslara baxıb.

Diqqətə çatdırılıb ki, yanacaqdoldurma məntəqəsində eyni vaxtda 15 avtobusa xidmət göstəriləcək. Burada bir avtobusun yanacaqla tam təmin edilməsinə cəmi 7 dəqiqə vaxt sərf olunur.

Sonra dövlət başçısı Sürücü Təlim Mərkəzində avtobusların idarə edilməsi prosesini izləyib.

www.ann.az