Bakı Yay Enerji Məktəbinin iştirakçıları Bakı Ali Neft Məktəbində

ADA Universitetinin Xəzər Enerji və Ətraf Mühit Mərkəzinin və SOCAR-ın  birgə təşkil etdiyi 9-cu Bakı Yay Enerji Məktəbinin iştirakçıları Bakı Ali Neft Məktəbində (BANM) olublar. Bakı Ali Neft Məktəbinin rektoru Elmar Qasımov qonaqları salamlayaraq onları BANM-də görməkdən məmnunluğunu bildirib. Elmar Qasımov rəhbərlik etdiyi Ali Məktəbin tarixi, fəaliyyət istiqamətləri və yarandığı qısa müddət ərzində əldə etdiyi uğurlardan söz açıb. Azərbaycanda yüksək ixtisaslı, ingilisdilli, peşəkar kadrların hazırlanmasının BANM-in əsas hədəfi olduğunu vurğulayıb. O, həmçinin Azərbaycanın neft və qaz hasilatında tarixi rolundan danışıb. 

Rektor Elmar Qasımov əsası Ümummilli lider Heydər Əliyev tərəfindən qoyulan və Prezident İlham Əliyev tərəfindən davam etdirilən uğurlu enerji strategiyası nəticəsində Xəzərin Azərbaycan sektorunda yeni yataqların kəşf olunduğunu nəzərə çatdırıb. O deyib ki, uğurlu neft strategiyası sayəsində ölkənin enerji təhlükəsizliyi təmin olunub, bu bölgə enerji təhlükəsizliyində Azərbaycan kimi etibarlı təchizatçı qazanıb.

Xatırladaq ki, ADA Universitetinin Xəzər Enerji və Ətraf Mühit Mərkəzi Azərbaycan Respublikası Dövlət Neft Şirkətinin (SOCAR) əməkdaşlığı ilə 4-17 iyul, 2015-ci il tarixlərində 9-cu Bakı Yay Enerji Məktəbini keçirir. Bu il məktəbə 17 ölkədən 47 iştirakçı qoşulub.

Qeyd edək ki, iki həftəlik məktəb ərzində iştirakçılar enerji sahəsinin siyasi və iqtisadi əsasları, hüquqi bazası və digər fundamental mövzularla yanaşı, enerji və xarici siyasət, enerji və ətraf mühit kimi mövzularda da mühazirələr dinləyəcək, interaktiv məşğələlərdən yararlanacaqlar. İki həftəlik sertifikat proqramı enerji və ətraf mühit məsələlərini təhlil etmək üçün dünyanın tanınmış alim, mütəxəssis və siyasətçilərini bir araya gətirəcək. İştirakçılar enerji və ətraf mühit, enerji hüququ və iqtisadiyyatı, neft-qaz sənayesində idarəçilik və SOCAR-ın strateji perspektivləri kimi məsələlərlə geniş şəkildə tanış olacaqlar.