"WizzAir": “Azərbaycanla əməkdaşlıq etməyəcəyik”

"WizzAir”lə olan əməkdaşlıq məsələsinə münasibət bildirən AZAL-ın vitse prezidenti Arif Məmmədov iyulun 22-də  mətbuat konfransında vurğulayıb ki,bu şirkətin uçuşlarına qadağa qoyulmayıb: "Sadəcə "WizzAir" aldığı xidmətlərin qiymətini ödəməyib. "WizzAir" qış mövsümündə uçuşlar həyata keçirmək istəmir. Amma biz onlara uçuşların ilboyu həyata keçirilməsi tələbi qoymuşuq. Şirkət yalnız yay mövsümündə fəaliyyət göstərmək istəyir”.

Məsələni araşdırmaq üçün ANN.Az saytı "Pegasus” və "WizzAir” aviaşirkətlərinə yazılı sorğu ilə müraciət edib. "Pegasus”dan hələ ki, rəsmi cavab alınmayıb.

"WizzAir” Azərbaycanla əməkdaşlıq etməyəcək” – bunu ANN.Az-ın soğrusuna cavab olaraq qurumun rəsmisi Tamara Mshvenieradze deyib.

"WizzAir” rəsmisi bildirib ki, AZAL bizimlə müqavilə şərtlərini dəyişib: "Buna görə də "WizzAir”in  Budapeşt-Bakı xidmət dayandırılıb. "WizzAir” Azərbaycanda göstərilən xidmətləri ödəmək üçün heç vaxt imtina etməyib. Biz Mərkəzi və Şərqi Avropanın ən ucuz hava yolları aviaşirkətiyik. Buna görə də bütün xidmətləri yüksək səviyyədə həyata keçiririk. "WizzAir” 2015-ci il üçün bütün marşurut xətlərini səfərbər edib. Bu səbəbdən də bu il Azərbaycanla əməkdaşlıq edə bilməyəcəyik. Hazırda Bakıya uçuşlar yoxdur.  Amma Azərbaycan tərəfdən yeni bir təklif olarsa, bu təklifi nəzərdə keçirə bilərik”.

AZAL-da tarif qiymətlərinin yüksək olmasına hətta ölkə başçısı İlham Əliyev sərt münasibət göstərib. Prezident bildirib ki, "Aviabiletlərin qiyməti bəzi hallarda süni şəkildə qaldırılır. Sual olunur: nəyə görə? Nə üçün? Yüksək xidmət göstərilir. Mən bunu alqışlayıram. Doğrudan da bizim AZAL şirkətimiz yüksək xidmət göstərir. Bunu mənə AZAL-ın təyyarələri ilə gələnlər deyirlər. Mən bunu alqışlayıram. Ancaq Azərbaycan yanacağı xaricdən almır, özü istehsal edir. Başqa ölkələrə nisbətən ağ neft ucuz qiymətə verilir axı! Nə üçün qiymətlər bahadır? AZAL dövlət tərəfindən böyük subsidiyalar alır. Bütün təyyarələr dövlət büdcəsinin vəsaiti hesabına alınır, bütün aeroportlar dövlət hesabına tikilir, bütün şərait dövlət hesabına yaradılır. Nəyə görə biletlərin qiyməti başqa ölkələrə, şəhərlərə nisbətən baha olmalıdır? Nə üçün? Ona görə, mən tapşırıram hökumət, Maliyyə Nazirliyi, İqtisadiyyat və Sənaye Nazirliyi bu məsələ ilə məşğul olsunlar. Həm müqayisə aparın, həm də burada tənzimləmə mexanizmi, hər şey şəffaf olmalıdır və qiymətlər süni şəkildə qaldırılmamalıdır".