“Komandamla fəxr edirəm” – Rəşad Sadıqov

"Bütün Azərbaycan xalqını təbrik edirəm. Bu, hamımızın birlikdə qazandığımız qələbədir. Bu qələbəyə çox ehtiyacımız var idi”.

Bu sözləri "Qarabağ”ın kapitanı Rəşad Sadıqov "Yanq Boyz”a qalib gələrək (3:0) Avropa Liqasının qrup mərhələsinə yüksəldikləri oyundan sonra deyib.

Təcrübəli futbolçu  qələbəyə layiq olduqlarını bildirib: "Biz dərk edirik ki, hansı komandanın uğurları üçün çalışırıq. Üzərimizdə olan məsuliyyəti də hiss edərək meydana çıxırıq. Düşünürəm ki, layiqli qələbə qazandıq”.

Meydançanın durumundan danışmaq istəməyən kapitan  gözlədiklərindən daha yaxşı çıxış etdiklərini söyləyib: "Problem hər iki komandaya təsir edirdi. Oyundan qabaq düşünürdük ki, bizim üçün daha çox problem olacaq. Çünki biz daha çox texnikalı futbol nümayiş etdiririk, rəqib isə hava toplarından oynayır”. 

Sadıqov onu da qeyd edib ki, "Yanq Boyz”la qarşılaşma avrokuboklardakı ən yaxşı oyunlarından biridir: " Bütün komanda yoldaşlarımla fəxr edirəm. Lazım olan futbolu oynadılar. Məşqçilər də oyundan qabaq təlimat vermişdilər ki, hesabı qorumaq yox, hücum qurub öz futbolumuzu oynayacağıq. Meydançanın durumuna da fikir vermədik. Sevinirik ki, hər şey yaxşı alındı. Demək olar ki, ən yaxşı oyunlarımızdan birini oynadıq”.