"Panatinaikos"un baş məşqçisi: "Qəbələ" zəif olmadığını təsdiqlədi"

"Oyundan öncə avrokuboklarda zəif komandanın olmadığını söyləmişdim. Təəssüf ki, "Qəbələ" də bunu təsdiqlədi".

Qol.Az-ın Yunanıstan mətbuatına istinadən verdiyi məlumata görə, bu sözləri "Panatinaikos"un baş məşqçisi Yannis Anastasiou "Qəbələ" ilə 2:2 bərabərə qaldıqları görüşdən sonra deyib.

"Qəbələ"nin komandasının buraxdığı səhvləri bağışlamadığını deyən 42 yaşlı mütəxəssis avrokuboklardan kənar qalmalarının onlar üçün acı olduğunu bildirib: "Oyuna yaxşı başladıq. Lakin ilk epizodda qola yaxın olsaq da, hesabı aça bilmədik. Əvəzində rəqib ilk təhlükəli vəziyyətdən fərqləndi. Buna baxmayaraq, bərabərlik qolunu vurmağı bacardıq. Daha sonra hücumların kəsərini artırsaq da, yenə də son zərbələrdə dəqiqlik çatmadı.

Fasilədən sonra daha ağıllı və müəyyən mənada kəşfiyyat xarakterli oyunmağa qərar verdik. Lakin təəssüf ki, rəqib səhvlərimizi bağışlamadı və bizi yenə cəzalandırdı. Çox axmaq qol buraxdıq. Ümumiyyətlə, "Qəbələ"nin 3 qol imkanı oldu ki, bunların da ikisini qola çevirdilər. Daha sonra bərabərlik qolunu vursaq da, qələbə qazana bilmədik. Bizim üçün acı gündür. Çünki qrup mərhələsində oynamaq istəyirdik. Ancaq alınmadı. Buna baxmayaraq, özümüzdə güc tapmalı və növbəti çempionat oyunlarına hazırlaşmalıyıq".