Azərbaycan UEFA reytinqində mövqeyini qorudu

UEFA yeni reytinq siyahısını açıqlayıb.

Qol.Az-ın qurumun rəsmi saytına istinadən verdiyi məlumata görə, Avropa Liqasında mübarizəni davam etdirən "Qarabağ" və "Qəbələ" klubları ötən gün ölkəmizə növbəti xalları qazandırıblar.

Öz meydanında "Yanq Boyz"a 3:0 hesabı ilə qalib gələn "Qarabağ" 0,250, Yunanıstanda "Panatinaikos”la heç-heçə edən "Qəbələ" isə ölkəmizin hesabına 0,125 xal qazandırıb.

Beləliklə, Azərbaycan cari mövsüm qazandığı xalların sayını 3,125-yə yüksəldib. Bunların 1,125-i "Qəbələ"nin, 1-i "Qarabağ"ın, 0,750 "İnter"in və 0,250 xal isə "Neftçi"nin payına düşür. Hazırda hesabında 13,625 reytinq xalı olan Azərbaycan 26-cı pillədəki mövqeyini qoruyub.

Ölkəmizin növbəti hədəfi Norveçdir. Azərbaycan 25-ci pillədə qərarlaşan Norveçdən 2,625 xal geri qalır. Ölkəmiz ən yaxın izləyicisi Qazaxıstanı 0,500 xal qabaqlayır.

Qeyd edək ki, siyahıya yenə İspaniya başçılıq edir. Almaniya ikinci, İngiltərə isə üçüncü pillədə qərarlaşıb.