Yığmamız UEFA reytinqində neçəncidir?

UEFA yığma komandaların yeni reytinq siyahısını açıqlayıb.

Qol.Az-ın qurumun rəsmi saytına istinadən verdiyi məlumata görə, siyahıda 54 komanda yer alıb.

Millimizin mövqeyində dəyişiklik olmayıb. Robert Prosineçkinin komandası 17,586 xalla 41-ci pillədə qərarlaşıb. Siyahıda millimizdən sonrakı pillələri Gürcüstan, Latviya, Moldova, Kipr, Makedoniya, Lüksemburq, Farer adaları, Lixtenşteyn, Qazaxıstan, Malta, Andorra, San Marino və Cəbəllütariq yığmaları tutub.

Yığmamızın "Avro-2016"nın seçmə mərhələsindəki rəqiblərindən İtaliya millisi 2 pillə irəliləyərək 5-ci yerə yüksəlib.

Son iki turda uğursuz nəticə ilə diqqət çəkən Xorvatiya yığması 5 pillə geriləyərək 14-cü olub. Norveç 24-cü (+3), Bolqarıstan 37-ci (-3) və Malta 51-ci (0) pillədə yer alıb.

Qeyd edək ki, siyahıya yenə son dünya çempionları Almaniya yığması başçılıq edir. İspaniya ikinci, İngiltərə isə üçüncüdür.