"Azərbaycanla oyunun asan olacağını düşünənlər yanılırlar"

"Yenidən yığmaya qayıtdığım üçün şadam. Konte məni yaxşı tanıyır. O, məni milliyə çağırmağı lazım bildisə, komandama kömək etməyə hazıram. İtaliya yığmasında texnikalı hücumçular var. Mən də onlarla birgə olduğum çox şadam".

Qol.Az-ın məlumatına görə, bu sözləri İtaliya millisinin hücumçusu Fabio Kvalyarella ölkəsinin mətbuatına açıqlamasında deyib.

"Avro-2016"nın seçmə mərhələsində qarşılaşacaqları Azərbaycanla oyuna toxunan "Torino"nun futbolçusu Bakıda onları çətin oyunun gözlədiyini bildirib: "Biz doğma azarkeşlərimiz önündə yaxşı futbol sərgiləyirik. Ancaq istərdik ki, bunu səfər matçlarında da göstərək. Konte bizim meydanda xarakter göstərməyimizi istəyir. O, bizi Azərbaycanla matçda çox çalışmalı olduğumuzla bağlı xəbərdar etdi. Kim düşünür ki, Azərbaycana qarşı asan olacaq, yanılırlar. Bakıda qələbə qazanmaqla Avropa çempionatının final mərhələsinə vəsiqəni təmin etməliyik".

Qeyd edək ki, oktyabrın 10-da Bakı Olimpiya stadionunda keçiriləcək Azərbaycan - İtaliya oyunu saat 21:00-da başlayacaq.