"Qəbələ"yə qalib gəlməliyik" – PAOK-un futbolçusu

"Nə deyəcəyimi bilmirəm. Nəticə bizi məyus etdi. Bu cür oyunla qələbə qazanmalı idik. Ancaq bir xalla kifayətləndik".

Qol.Az-ın Yunanıstan mətbuatına istinadən verdiyi məlumata görə, bu sözləri PAOK-un futbolçusu Roberto Mak superliqanın 11-ci turunda "Panetolikos"la görüşdən (0:0) sonra deyib.

Slovakiyalı futbolçu Avropa Liqasının qrup mərhələsində qarşılaşacaqları "Qəbələ" ilə oyuna da toxunub. O, bu görüşdən qələbə ilə ayrılacaqlarına ümid etdiyini bildirib:

"Mövsümün əvvəlindəki kimi oynamırıq. Səbəbini bilmirəm. Ancaq biz bir komanda olmalı və sonadək mübarizə aparmalıyıq. Qarşıda "Qəbələ" ilə matçımız var. Rəqibimiz yaxşı komandadır. Bakıdakı oyunda bunun şahidi olduq. Ancaq bu dəfə doğma azarkeşlərimiz önündə oynayacağıq. Bu matçda daha çox çalışmalı və qələbə qazanmalıyıq. Ümid edirəm ki, istəyimizə nail olacağıq və Avropa Liqasında yolumuza davam edəcəyik".

Qeyd edək ki, noyabrın 26-da keçiriləcək PAOK - "Qəbələ" oyunu Bakı vaxtı ilə gecə saat 00:05-də başlayacaq.