Bakıya gələcək bütün "Formula 1" pilotları məlumdur - SİYAHI

19.02.2016 16:15

Ötən gün Formula 1-də boş olan son vakansiya da tutulduqdan sonra komandaların tam heyəti formalaşıb.

Trend "F-1.az" saytına istinadən məlumat verir ki, bununla da iyun ayında ölkəmizə gələcək komandaların tam heyəti məlum olub.

Bu il çempionatda 11 komanda iştirak edir və hər bir komandanı iki sürücü təmsil edir. Ona görə də Hökumət Evinin qarşısındakı start-finiş düzlüyündə iyunun 19-da dünyanın ən sürətli 22 sürücüsünü görəcəyik. Qeyd edək ki, peletonda 5 dünya çempionu (Sebastian Fettel, Lyuis Hemilton, Fernando Alonso, Kimi Raykkönen və Censon Batton) yarışacaq.

Aşağıdakı cədvəldən də göründüyü kimi, peletonda ən təcrübəli sürücü Censon Battondur. Britaniyalı sürücü 17-ci mövsümünə hazırlaşır və indiyə kimi 287 Qran-Pridə iştirak etməklə 284 yarışda start alıb, 15 mindən çox dövrə vurmaqla 75.5 min km-dən çox məsafə qət edib. Bakıya gələn sürücülər arasında ən titullusu dördqat dünya çempionu Sebastian Fettel olsa da, qələbə sayına görə cəmi bir qələbəlik üstünlük sonuncu dünya çempionu Lyuis Hemiltondadır – 43 qələbə. Amma S.Fettel 2013-cü ilin ikinci yarısında ardıcıl 9 qələbə qazanmaqla adını "Formula 1" tarixinə yazdırıb.

Podiumların sayına görə Bakıya gələcək sürücülər arasında Fernando Alonso (90) liderlik etsə də, pouldan və birinci cərgədən start almaq üzrə lider L.Hemiltondur. Sürətli dövrələrə görə Kimi Raykkönen (42) rəqiblərini çox qabaqlayır. S.Fettelin 28 dubluna (pouldan start almaqla qələbə qazanmaq) L.Hemilton 9 het-triklə (poul, qələbə və sürətli dövrə) cavab verib. Startdan finişədək liderlik daha çox etdiyinə görə (13 dəfə) S.Fettel peletonda 4 dəfə Böyük Dəbilqə (het-trik və startdan finişədək liderlik) qazanmış sürücüdür.

S.Fettel həm də "Formula 1" tarixində indiyə qədər ən çox xal qazanmış sürücüdür. Hazırda onun hesabında 1896 xal var.

Amma Bakıda keçiriləcək yarışa qədər təqvimdə 7 yarış var və bu cədvəldəki bir çox göstəricilər üzrə adlar dəyişə bilər.

Göstərici	2016-cı il		Formula 1 tarixində
Göstərici	Sürücü	Say	Sürücü	Say
F1-də mövsüm	Censon Batton	16	Rubens Barrikello	19
Qran Pri	Censon Batton	287	Rubens Barrikello	326
Start	Censon Batton	284	Rubens Barrikello	322
Qələbə	Lyuis Hemilton	43	Mixael Şumaxer	91
Ardıcıl qələbə	Sebastian Fettel	9	Sebastian Fettel	9
Podium	Fernando Alonso	97	Mixael Şumaxer	155
Ardıcıl podium	Lyuis Hemilton	16	Mixael Şumaxer	19
Poul	Lyuis Hemilton	49	Mixael Şumaxer	68
Ardıcıl poul	Lyuis Hemilton	7	Ayrton Senna	8
Birinci cərgə	Lyuis Hemilton	90	Mixael Şumaxer	116
Ardıcıl birinci cərgə	Lyuis Hemilton	20	Ayrton Senna	24
Sürətli dövrə	Kimi Raykkönen	42	Mixael Şumaxer	77
Ardıcıl sürətli dövrə	Kimi Raykkönen	6	Alberto Askari	7
Dubl	Sebastian Fettel	28	Mixael Şumaxer	40
Het-trik	Lyuis Hemilton	9	Mixael Şumaxer	22
Startdan finişədək liderlik	Sebastian Fettel	13	Ayrton Senna	19
Böyük Dəbilqə	Sebastian Fettel	4	Cim Klark	8
Dövrələr	Censon Batton	15182	Mixael Şumaxer	16825
Liderlik dövrələri	Sebastian Fettel	2614	Mixael Şumaxer	5112
Məsafə, km-lə	Censon Batton	75542.46	Mixael Şumaxer	81209.07
Liderlik məsafəsi, km-lə	Sebastian Fettel	13754.83	Mixael Şumaxer	24153.11
Xallar	Sebastian Fettel	1896	Sebastian Fettel	1896