"Azərbaycandakı qazon bərbad idi"

"Seçmə mərhələyə yaxşı başladıq. Hətta müəyyən müddət qrupda İtaliyanı da geridə qoyduq. Lakin Azərbaycan və Norveçlə oyunlardakı uğursuzluq baş məşqçi dəyişikliyi ilə nəticələndi".

Qol.az-ın Ukrayna mətbuatına istinadən verdiyi məlumata görə, bu sözləri Xorvatiya millisinin və Kiyev "Dinamo"sunun futbolçusu Domaqoy Vida deyib.

26 yaşlı futbolçu "Avro-2016"nın seçmə mərhələsində Bakıda millimizlə 0:0 bərabərə qaldıqları oyun haqda danışıb: "Əminəm ki, qrupda üçüncü pilləni tutsaydıq belə, Avropa çempionatının final mərhələsinə vəsiqə qazanacaqdıq. Lakin məsələni uzatmaq istəmədik. Məsuliyyət çox böyük idi. Yaxşı ki, hər şey lehimizə oldu.

Təbii ki, ardıcıl iki görüşdəki uğursuzluğa reaksiya yaxşı olmadı. Düşünürəm ki, bizə qarşı olan tənqidlər ədalətli idi. Hər kəs bizdən maksimum nəticə gözləyirdi, ancaq həmin oyunlara lazımi səviyyədə yanaşmadıq. Azərbaycanla matçdakı uğursuzluğu qazonun bərbad vəziyyətdə olması ilə izah edərdim. Norveçlə oyuna isə istənilən səviyyədə köklənə bilmədik".
www.ann.az