“Qarabağ”a təslim olmaq fikrimiz yoxdur”

"Qarabağ” güclü komandadır. Onların avrokubok təcrübəsi kifayət qədərdir”.

Qol.az-ın məlumatına görə, bu sözləri "Qarabağ”ın Çempionlar Liqasının II təsnifat mərhələsində rəqibi olan "Düdelanj” klubunun baş məşqçisi Dino Topmöller Lüksemburq mətbuatına açıqlamasında deyib.

"Qarabağ”la oyun almaniyalı mütəxəssisin Lüksemburq klubunda rəsmi debüt matçı olacaq. 36 yaşlı məşqçi yeni komandası ilə ilk oyunda sərfəli nəticə qazanmağa çalışacağını bildirib:

"Rəqibin çox güclü komanda olduğunu bilirik. Onlar son iki ildə Avropa Liqasının qrup mərhələsində oynayıb. "Anderlext”i məğlub etməyi, "Monako”dan xal almağı bacarıblar. Ancaq onlara təslim olmaq fikrimiz yoxdur”.

Qeyd edək ki, komandalar arasında ilk oyun iyulun 12-də Bakıda, cavab matçı isə bir həftə sonra Lüksemburqda keçiriləcək.