"Bu qədər təzyiqin altından qalxmaq asan deyildi"

"Oyunçularımı təbrik edirəm. Hər kəsin istədiyi də bu idi. Ümid edirəm ki, bu nəticə 1/8 finala yüksəlməmiz üçün yetərli olar".

Qol.az-ın xarici KİV-lərə istinadən verdiyi məlumata görə, bu sözləri Türkiyə millisinin baş məşqçisi Fatih Terim "Avro-2016"da Çexiyaya qalib gəldikləri oyundan sonra deyib.

63 yaşlı mütəxəssis "Ən böyük uğur turnirdə iştirak etməkdir. Bu gün Nitsada türk bayraqları ilə gəzirsinizsə, bunu yığmaya borclusunuz. Təbii ki, hər kəs yığmanın uğur qazanmasını istəyir. Ancaq bəzən olmur. Əvvəlki iki görüşdəki uğursuzluq və mətbuatdakı təzyiq oyunçularıma uduza bilərik qorxusu yaratmışdı. Ancaq şükürlər olsun ki, qələbə qazanmağı bacardıq. Bu qədər təzyiqin altından qalxmaq asan deyildi. İnşallah, növbəti mərhələdə ilk iki matçdakı kimi oynamarıq". 

Qeyd edək ki, "Avro-2016"da qrup mərhələsinin son turunda Çexiyaya 2:0 hesabı ilə qalib gələn Türkiyə millisi 1/8 finala yüksəlmək şansını saxlayıb.