"Formula 1"də yerli və xarici media arasında qeydiyyat prosesi fərqlənir - AÇIQLAMA

ANN.Az xəbər verir ki, bunu "Formula 1” Baku Grand Prix Şirkətinin İctimaiyyətlə əlaqələr şöbəsinin rəhbəri Nigar Arpadarai medianın yarışda rolu ilə bağlı sualları cavablandırarkən deyib. N. Arpadarai bildirib ki, bu məsələlər birbaşa olaraq, Beynəlxalq Avtomobil Federasiyası (FİA) tərəfindən təşkil olunur:

"Beynəlxalq jurnalistlərə olan ayrıseçkiliklə bağlı yayılanlar tamamilə yanlış məlumatdır. Çünki ora gələn daimi media var. Elə jurnalistlər var ki, il boyu bütün yarışlarda iştirak etmək üçün xüsusi akkreditasiyaları var. Onlar istənilən yarışa rahat şəkildə gələ bilir. Ötən il Azərbaycan jurnalistləri üçün xüsusi qeydiyyat proseduru var idi. Hər kanaldan cəmi 1 jurnalist və 1 operator gələ bilərdi. Eyni zamanda, qeydiyyatdan keçmək üçün 4 kanal müraciət edə bilərdi. Lakin danışıqlar apardıq və kanalların sayı 7-ə çıxarıldı. Təəssüf ki, bizim buna təsir göstərmək imkanımız yox idi. Eyni zamanda, qəzet və internet portallar üçün də xüsusi qeydiyyat proseduru vardı. FİA əsas olaraq nəzərə alır ki, həmin portal il ərzində nə dərəcədə Bakı və beynəlxalq Qran Priləri işıqlandırır”.