“Neftçi”nin mərhələ adlamaq şansı “Qarabağ”dan çoxdur”

Azərbaycanın tanınmış futbol mütəxəssisi Arif Əsədov “Qarabağ” və “Neftçi”nin avrokuboklardakı çıxışını dəyərləndirib.

Qol.Az saytına açıqlamasında veteran futbolçu əvvəlcə “Qarabağ”ın Çempionlar Liqasının III təsnifat mərhələsinin “Zalsburq”la bu gün keçiriləcək cavab matçı haqda danışıb:

“Qarabağ”ın rəqibi doğrudan da çox güclüdür. Buna baxmayaraq komandamız ilk oyunda “Zalsburq” üzərində qələbə qazandı. “Zaslsburq” ikinci hissəsində göstərdi ki, tam komplektləşmiş, rəqibi daima təzyiq altında saxlaya bilən, pressinq edən, sürətli bir komandadır. Bugünki oyunda həmin pressinqi ikiqat edəcəklər. Yəqin ki, oyunlarını bunun üzərində quracaqlar. Çünki “Qarabağ” özündə top saxlamağı yaxşı  bacarır. Rəqib bilir ki, ancaq pressinqlə komandamızın oyununu poza bilərlər. 

Bugünkü oyunda “Qarabağ”ın işini çətinləşdirən amillərdən biri də Reynaldonun yoxluğudur. Düzdür, çox çətin olacaq, amma inanırıq ki, “Qarabağ” səfərdən üzüağ gələcək. Rəqib ilk dəqiqələrdən güclü təzyiq edəcək.  Komandamız bu təzyiqlərə davam gətirə bilsə, getdikc oyunu ələ ala bilər”.

A.Əsədov “Zalsburq”da problemlər olduğunu vurğulayıb:  “Zalsburq”un əsas problemi onun müdafiəsindədir. Xüsusilə müdafiəçilərinin sürəti çatmır. Hiss olunur ki, “Qarabağ”ın hücum xətti “Zaslburq”un müdafiəsindən daha sürətlidir. İlk oyunda gördük ki, komandamız bir neçə dəfə əks-hücumlarda rəqibi çətin vəziyyət saldı.  “Zalsburq”un müdafiəsində bu gün daha çox boşluq ola bilər. Çünki onlar əsasən hücuma aludə olacaqlar. Ona görə də “Qarabağ”ın Reynaldoya bu gün daha çox ehtiyacı var. 

Bir vaxtlar “Neftçi” klubunu çalışdıran mütəxəssis sabiq komandasının Avroliqanın III təsnifat mərhələsinin “Çixura” ilə sabah keçiriləcək cavab matçı haqda da fikirlərini bildirib: “Statistika göstərir ki, “Neftçi” avrokuboklarda artıq səkkiz oyundur ki, evdə qalib gələ bilmir. Sanki bir sindrom yaranıb.  Amma ilk oyunda öz meydanında qolsuz heç-heçə etmək həmişə yaxşı nəticə hesab olunub.  Çünki qol buraxmırsan və səfərdə qol vurmaq imkanın var. Nəzərə olsaq ki, “Neftçi”nin hücum xəttində texnikalı, qol vurmağı bacaran futbolçular var, onda komandamızın qalib gəlmək şansının çox olduğunu deyə bilərik. Düşünürəm ki, növbəti mərhələyə yüksəlmək üçün “Neftçi”nin  şansı “Qarabağ”dan daha çoxdur”.

ANN.Az