Ünal Aysal: "Kim 20 milyon versə, Sneyder gedəcək"

"Qalatasaray" klubunun prezidenti Ünal Aysal komandanın aparıcı futbolçusu Uesli Sneyder barəsindəki transfer xəbərlərinə münasibət bildirib.

Qol.Az-ın "Milliyet" qəzetinə istinadən verdiyi məlumata görə, Ü.Aysal hollandiyalı futbolçunun 20 milyon avro qarşılığında komandadan ayrılacağını deyib.

"DÇ-2014"də uğurlu çıxışı ilə diqqət çəkən Sneyderi komandada saxlamaq istədiklərini bildirən klub prezidenti futbolçunun müqaviləsindəki maddəyə görə bunun mümkün olmayacağını vurğulayıb: "Biz onu komandada saxlamaq istəyirik. Ancaq Sneyderin müqaviləsində 20 milyon avro qarşılığında onun azad agent statusu alacağına dair maddə var. Hər hansı bir komanda bu məbləği ödəyərsə və futbolçu da getmək istəyərsə, o zaman istəsək belə, Sneyderi komandada saxlaya bilmərik. Hüquqi tərəfdən bunu etməyimiz mümkün deyil”.

Qeyd edək ki, Sneyderin adı yeni mövsümdən Lui van Qalın çalışdıracağı "Mançester Yunayted" klubu ilə hallanır. 30 yaşlı futbolçu milli komandanın məşqində verdiyi açıqlamasında "əgər Lui van Qal sizinlə çalışmaq istəyirsə, ona "yox" deyə bilmərsiniz" söyləməklə "Qalatasaray"dan ayrıla biləcəyinə işarə etmişdi.

ANN.Az