Mircavadov: “Mundialın sürpriz komandası Belçika və Qana ola bilər”

- Futbolun nə dərəcədə inkişaf etdiyi dünya çempionatı zamanı bilinir. Hər Avropa və dünya çempionatından sonra məşqçilər özləri üçün müəyyən nəticə çıxarır. Məncə, builki yarış əvvəlkilərdən maraqlı olacaq. İlk növbədə ona görə ki, mundial Braziliyada keçiriləcək. Orada futbolu sevirlər. Təşadüfi deyil ki, ən çox futbol stadionu olan ölkə Braziliyadır. Müəyyən komandalarda yeni taktiki sistemin şahidi olacağıq. Artıq yoldaşlıq oyunlarında bunu müşahidə etmişəm.

- Azarkeşlik etdiyiniz komanda var?

- Mən yaxşı oyunu sevirəm. Məlumdur ki, biz mütəxəssislər dünya çempionatından çox şey öyrənirik. Adətən, ağıllı futbol oynayan komandalara azarkeşlik edirəm.

- Favoritləriniz hansı komandalardır?

- Cənubi Amerikadan Braziliya, Argentina və Uruqvay yığmalarını şanslı görürəm. Avropadan isə Hollandiya, İspaniya, İtaliya və Almaniyanın adını qeyd edə bilərəm. Fransa millisi üçün bir qədər ağır olacaq. Çünki heyətində ulduz futbolçular yoxdur. Belə komandalar üçün yüksək nailiyyət əldə etmək çətindir. İngiltərənin də yaxşı nəticə qazanacağına inanmıram. Fikir verin, Premyer Liqada ingilis futbolçuların sayı çox azdır.

- Ancaq "Çelsi"nin baş məşqçisi Joze Mourinyo düşünür ki,  finalda İngiltərə və Portuqaliya qarşılaşacaq.

- İngiltərənin oyunlarını izləmişəm. Düzdü, stabil çıxış edirlər, ancaq heyətində lider oyunçular azdır. Bu, Mourinyonun öz düşüncəsidir. O, İngiltərədə çalışdığı üçün belə bir fikir bildirib. İngiltərə hələ qrupdan çıxsın, sonrasına baxarıq.

- Hər dünya çempionatında sürpriz komandalar olur. Sizcə bu dəfə hansı millilərdən sürpriz nəticələr gözləmək olar?

- Təbii ki, bir neçə komanda sürprizlər edəcək. Gözləniləndən aşağı səviyyədə çıxış edən komandalar da olacaq. Uğursuz nəticə qazanacaq komandaların adlarını indidən demək çətindir. Ancaq müəyyən yığmalar var ki, həqiqətən onlardan sürpriz gözləmək olar. Məncə, bunu Belçika və Qana milli komandaları edəcək. Onların oyunlarını izləmişəm. Doğrudan da çox güclü futbolçulardan təşkil olunmuş kollektivə malikdirlər.

- Bu gecə mundialın ilk oyununda Braziliya yığması Xorvatiya ilə qarşılaşacaq. Meydan sahiblərini matçın aşkar favoriti hesab etmək olar?

- Ümumiyyətlə, Braziliya bütün oyunlarda böyük təzyiqlərlə üzləşəcək. Təzyiqi azarkeşlər edəcək. Yerli azarkeşlər həddən artıq emosionaldırlar. Onlar zəif oyunu qəbul etməyəcəklər. Xorvatiya isə keçmiş Yuqoslaviyada ən güclü yığma komandadır. Üstünlük Braziliya tərəfində ola bilər. Ancaq deməzdim ki, onlar asan qələbə qazanacaq. Həmişə Braziliya üçün ilk oyun ağır keçir. Fərdi ustalıqdan çox şey asılı olacaq. Düşünürəm ki, Braziliya 1:0 hesabı ilə qalib gələ bilər.