Cüdo üzrə Azərbaycan birinciliyi başa çatıb

18 yaşadək yeniyetmələr arasında cüdo üzrə Azərbaycan birinciliyi başa çatıb.


Federasiyanın Mətbuat Xidmətindən Anews.az-a verilən məlumata görə, Fövqəladə Hallar Nazirliyinin (FHN) Hövsan qəsəbəsində yerləşən İdman Sağlamlıq Mərkəzində keçirilən yarışda 76 rayon və şəhərdən olan klub, cəmiyyət və idman təşkilatlarından gənclər iştirak edib.


Nəticələrə əsasən, 25 komanda müxtəlif əyyarlı medal qazanıb, onlardan da 13-ü regionları təmsil edib.


Ümumilikdə Azərbaycan birinciliyində 514 idmançı (439 oğlan, 75 qız) medallar uğrunda mübarizə aparıb. Yarışın son nəticəsinə görə, ümumi komanda hesabında 13 nömrəli İxtisaslaşdırılmış Olimpiya Ehtiyatları Uşaq-Gənclər İdman Məktəbi (Bakı şəhəri) 1-ci, "Neftçi” İdman Klubu 2-ci, 1 nömrəli Təhsil Respublika İdman Mərkəzi Sumqayıt isə 3-cü yerə layiq görülüb.


Yarışın əsas məqsədi Azərbaycanda cüdonun coğrafiyasını genişləndirmək, yeniyetmələr arasında idmanın kütləvi təbliğinə və təşviqinə nail olmaq, eyni zamanda perspektivli namizədləri yığma komandaya seçmək idi.


Yarışlara ilk dəfə paytaxt Bakı istisna olmaqla, 34 müxtəlif regiondan olan idmançılar qatılıblar.

www.anews.az