İsveç azərbaycanlı güləş məşqçisinin deportasiyasına qərar verib

İsveçin Miqrasiya Xidməti müharibədən sonra Xarkovdan İsveçə köçən azərbaycanlı güləş məşqçisi Şahid Bilalovun ailəsinin deportasiyası ilə bağlı qərar qəbul edib. Bu barədəVimmerby Tidning nəşri məlumat yayıb.

Şahid Bilalov, həyat yoldaşı Səadət və övladları Ayşəms ilə Turqut İsveçin Mariannelund şəhərində yaşayırlar. Ukrayna vətəndaşı olan uşaqlara yaşayış icazəsi verilib. Lakin 1990-cı illərdə Azərbaycandan Ukraynaya köçən və Azərbaycan vətəndaşlığını saxlayan valideynlərə icazə verilməyib.

Miqrasiya Xidməti qərarı Avropa İttifaqının müvəqqəti müdafiə direktivası ilə əsaslandırıb. Sözügedən direktiv yalnız Ukrayna vətəndaşlarına şamil olunur.

Qərara əsasən, Şahid və Səadət Bilalovlar Azərbaycana qayıtmalı və ya onları qəbul edəcək başqa bir ölkə tapa bilməlidirlər. Ailənin Azərbaycanda qalacaq yeri yoxdur, Xarkova qayıtmaq istəmirlər.

Bilalov Mariannelundda pəncərə istehsalı zavodunda çalışır və gələcəkdə güləş klubu açmağı planlaşdırır.

O, əvvəllər Azərbaycanda və Ukraynada məşqçi kimi fəaliyyət göstərib. Həyat yoldaşı isə uşaq bağçasında işləyir.

Ailə Miqrasiya Xidmətinin qərarından şikayət edib və iş miqrasiya məhkəməsində araşdırılacaq. Bilalovlar İsveçdə qalmağa ümid edirlər.

N.Təbrizli