“Qarabağ”ın oyununa biletlər bu tarixdən satışa çıxarılacaq

UEFA Avropa Liqasının I təsnifat mərhələsində keçiriləcək “Qarabağ” – “Vestri” oyununun biletləri iyulun 3-də saat 15:00-dan etibarən satışa çıxarılacaq. Bu barədə klubun mətbuat xidməti məlumat yayıb.

Bakıda, Tofiq Bəhramov adına Respublika stadionunda keçiriləcək qarşılaşma üçün standart biletlərin qiyməti 5, 10, 15 və 20 manat, VIP sektorlar üzrə 50, 75 və 100 manat, VVIP sektorlar üzrə isə 150 manat müəyyən edilib.

Biletlər yalnız iTicket.az-ın rəsmi saytı və mobil tətbiqi vasitəsilə onlayn əldə oluna bilər. Onlayn alış zamanı problem yaranarsa, azarkeşlər iTicket.az-ın satış məntəqələrinə, Park Bulvardakı “Qarabağ” FK Fan Shop-a və Tofiq Bəhramov adına Respublika stadionunun kassalarına müraciət edə bilərlər.

“Qarabağ” – “Vestri” oyunu iyulun 9-da saat 20:00-da başlayacaq.