"Qarabağ" Kiyev "Dinamo"sunu məğlub edərək pley-offa yüksəlib - Yenilənib

“Qarabağ” UEFA Konfrans Liqasının pley-off mərhələsinə yüksəlib.

Qurban Qurbanovun baş məşqçisi olduğu komanda III təsnifat mərhələsinin cavab oyununda Kiyev “Dinamo”sunu qəbul edib.

Tofiq Bəhramov adına Respublika stadionunda keçirilən qarşılaşma Azərbaycan təmsilçisinin 2:0 hesablı qələbəsi ilə başa çatıb.

“Qarabağ”ın heyətində Jali Muaddib 12-ci dəqiqədə hesabı açıb. Aleksey Kaşuk 69-cu dəqiqədə fərqi iki topa çatdırıb.

Beləliklə, ilk oyunda səfərdə 0:1 hesabı ilə məğlub olan “Qarabağ” iki oyunun nəticəsinə əsasən 2:1 hesabı ilə qalib gələrək pley-off mərhələsinə vəsiqə qazanıb.

Ağdam təmsilçisinin pley-off mərhələsindəki rəqibi “Tvente” (Niderland) – DAC 1904 (Slovakiya) cütünün qalibi olacaq.

***

UEFA Konfrans Liqasının III təsnifat mərhələsinin "Qarabağ" - "Dinamo" (Kiyev, Ukrayna) oyunu başlayıb.

Matç Tofiq Bəhramov adına Respublika stadionunda keçirilir.

Qarşılaşmanın baş hakimi ingiltərəli FIFA referisi Stüart Attuelldir.

***

UEFA Konfrans Liqasının III təsnifat mərhələsinin cavab oyununda qarşılaşacaq “Qarabağ” və Ukraynanın “Dinamo” (Kiyev) komandalarının start heyətləri açıqlanıb.

Komandalar meydana aşağıdakı heyətlərlə çıxacaqlar:

“Qarabağ”: 23. Martin Zlomisliç, 44. Elvin Cəfərquliyev, 4. Bense Varkonyi, 55. Bədavi Hüseynov, 2. Mateus Silva, 8. Marko Yankoviç, 35. Pedro Bikalyo, 10. Abdullah Zubir, 21. Aleksey Kaşuk, 7. Jali Muaddib, 20. Kadi Borges.

“Dinamo”: 71. Vyaçeslav Surkis, 5. Aleksey Siç, 40. Kristian Bilovar, 44. Vladislav Dubinçak, 32. Taras Mixavko, 6. Vladimir Brajko, 21. Castin Lonveyk, 15. Valentin Rubçinski, 39. Eduardo Gerreyro, 70. Boqdan Reduşko, 11. Matvey Ponomaryonko.

Qarşılaşma bu gün saat 20:00-da Tofiq Bəhramov adına Respublika stadionunda başlayacaq. Komandalar arasında Polşanın Lublin şəhərində keçirilən ilk oyunda “Dinamo” 1:0 hesabı ilə qalib gəlib.