Bakıda cüdo üzrə dünya çempionatına start verilir

Bu gün Bakıda cüdo üzrə böyüklər arasında dünya çempionatına start veriləcək.

Milli Gimnastika Arenasında keçiriləcək yarışın ilk günündə qadınlar -48 kq, kişilər isə -60 kq çəki dərəcəsində mübarizə aparacaqlar.

Azərbaycanın dörd təmsilçisi ilk yarış günündə tatamiyə çıxacaq.

-48 kq çəki dərəcəsində Şəfəq Həmidova 1/32 finalda Madaqaskar təmsilçisi Nataşa Razafindrakalo ilə qarşılaşacaq. Könül Əliyeva isə mübarizəyə 1/16 finaldan başlayacaq və Çilidən Mari Di Varqas Ley ilə üz-üzə gələcək.

-60 kq çəki dərəcəsində Balabəy Ağayev 1/16 finalda Belarus təmsilçisi Artsiom Kolasau ilə Ukrayna cüdoçusu Dilşot Xalmatov arasındakı görüşün qalibi ilə qarşılaşacaq. Əhməd Yusifovun rəqibi isə Özbəkistan təmsilçisi Baxrom Boturovla Monqolustan cüdoçusu Tumenjarqal Tuvşintur arasındakı görüşün qalibi olacaq.

Oktyabrın 10-dək davam edəcək fərdi yarışlarda 93 ölkədən 622 cüdoçu – 335 kişi və 287 qadın iştirak edəcək. Qarışıq komanda yarışları isə oktyabrın 11-də keçiriləcək.