İdmançılarımızın bu il rekord qırıblar

Azərbaycan idmançıları bu il nüfuzlu beynəlxalq yarışlarda qazandıqları medal sayında yeni rekord müəyyənləşdiriblər.

ANN.Az "Report"a istinadən xəbər verir ki, bu barədə Gənclər və İdman Nazirliyinin idman şöbəsinin müdiri Mirkamil Rəhimov məlumat verib.

Onun sözlərinə görə, ilin ötən 11 ayı ərzində dünya və Avropa çempionatları, eləcə də Dünya Kuboku turnirlərində ümumilikdə 789 medal əldə olunub. Bu isə ötənilki göstəricidən 7 medal çoxdur. M.Rəhimov bildirib ki, hələ bəzi yarışların protokolu nazirliyə təqdim edilməyib. O, bütün yarışlar yekunlaşdıqdan sonra medal sayının 800-ü keçəcəyinə əminliyini bildirib. Bununla belə, nazirlik rəsmisi olimpiya növləri üzrə medal sayının ötən ilə nəzərən az olacağını vurğulayıb. Amma o, hələlik dəqiq sayı bilmədiyini əlavə edib.

Qeyd edək ki, Azərbaycan idmançıları 2013-cü ildə Olimpiya və qeyri-Olimpiya idman növləri üzrə rəsmi beynəlxalq yarışlarda - dünya, Avropa çempionat və birinciliklərində, kubok yarışlarında 280 qızıl, 233 gümüş və 269 bürünc olmaqla, ümumilikdə 782 medal qazanıblar. Bunlardan 296-sı (101 qızıl, 74 gümüş, 121 bürünc) Olimpiya, 486-sı (179 qızıl, 159 gümüş, 148 bürünc) qeyri-Olimpiya növlərindən əldə olunub. 2012-ci ildə isə idmançılarımız 735 medala (255 qızıl, 244 gümüş, 236 bürünc) sahib olublar.

ANN.Az