Azərbaycanda əfv gözlənilir

Dünya Azərbaycanlılarının Həmrəylik Günündə əfv sərəncamı imzalana bilər. Aznews.az-a daxil olan məlumata görə, bununla bağlı hazırlıq işləri artıq yekunlaşmaq üzrədir.
 
Məsələ ilə bağlı danışan Milli Məclisin Əfv komissiyasının üzvü, millət vəkili Çingiz Qənizadə dəqiq bir söz deyə bilməyəcəyini bildirsə də, belə bir sərəncamın gözlənilən olduğunu söyləyib: "Cənab Prezident hər il ilin sonunda, ümumdünya azərbaycanlılarının həmrəylik günü münasibətilə əfv sərəncamı imzalayır. Ümid edirik ki, bu dəfə də İlham Əliyev belə bir humanist addım atacaq. Bu, sadəcə ehtimaldır, yəni əfv sərəncamının imzalanması Prezidentin səlahiyyətində olduğundan bu barədə dəqiq heç nə deyə bilmərəm.

Lakin onu bildirim ki, insan hüquqlarına dair yaradılan işçi qrupu hazırda daxil olan əfv ərizələri üzərində işləyir. Biz əfvlə bağlı hazırladığımız təklifləri bu ayın ortalarında Əfv Komissiyasına qədim edəcəyik. Köhnə praktikaya nəzər yetirdikdə görürük ki, bizim tövsiyəmiz və Əfv komissiyasının təqdimatı nəzərə alınır. Ehtimal edirik ki, Prezident öz konstitusion hüququndan istifadə edərək, bir daha humanist addım olan əfv sərəncamı imzalayacaq”.
 
Millət vəkili onu da bildirib ki, təqdim edəcəkləri siyahıya həbsdə olan bir neçə müxalifət və QHT nümayəndələrinin adları da salınıb.

ANN.Az