Prosineçki: "Hakimin qərarı bütün Azərbaycan xalqını məyus etdi"

Millimizin baş məşqçisi Robert Prosineçki "Qarabağ"ın Avropa Liqasının qrup mərhələsində "İnter"lə qolsuz bərabərə qaldığı oyundan sonra fikirlərini bildirib.

ANN.Az Qol.Az-a istinadən xəbər verir ki, o, AFFA-nın saytına açıqlamasında hakimin Ağdam təmsilçisinin təmiz qolunu qeydə almadığını deyib:

"Azərbaycan futbol tarixinin ən vacib oyunlarından biri idi. İlk dəfə bir Azərbaycan klubu 1/16 final mərhələsinə vəsiqə qazanmağa bu qədər yaxınlaşmışdı. "Qarabağ”ın son dəqiqələrdə qaydalara uyğun vurduğu qolu çexiyalı referi qeydə almadı. Bir nəfərin özbaşınalığı, ağlasığmaz qərarı bütün Azərbaycan xalqını məyus etdi. Başa düşmürəm, nəyə görə hakim təmiz qolu qeydə almadı?! "Qarabağ” həmin oyunda qalib gəlməliydi. Təəssüf ki, onun bu  qərarı azarkeşlərin qəlbində silinməz iz qoydu".

Xorvatiyalı mütəxəssis "Qarabağ"da çıxış edən millimizin üzvlərinin oyununu da qiymətləndirib:

"Millinin üzvlərinə gəlincə, dünən bəzi epizodlarda daha yaxşı oynaya bilərdilər. Ümumilikdə götürsək, futbolçuların çıxışından razıyam. Onların potensialına bələdəm. Bilirəm ki, dünənkindən də yaxşı oynaya bilərlər. Xüsusilə, gənc oyunçuların potensialını qeyd etmək, onların üzərində işləmək lazımdır. Bilirik ki, onlar bundan da yaxşı oynaya bilərlər. Ad çəkmək istəmirəm. Hamı bilir ki, söhbət kimlərdən gedir. Futbolçular öz üzərilərində daha çox işləməlidirlər. Aşağı yaş qruplarından ibarət yığmalarda da istedadlı, potensialı yüksək olan uşaqlar var. Onları düzgün istiqamətləndirib bacarıqlarından istifadə etməliyik”.

ANN.Az